മാർക്ക് കൂട്ടാൻ മികച്ച പഠനമുറി

സ്റ്റഡിറൂമിൽ ഇരുന്നുള്ള പഠനം ഏകാഗ്രത വർധിപ്പിക്കും, മാർക്ക് കൂട്ടും. പഠനമുറി ഒരുക്കുമ്പോൾ ശ്രദ്ധിക്കേണ്ട കാര്യങ്ങൾ...

- ശ്രീദേവി

എവിടെയിരുന്നാലും പഠിക്കാൻ പറ്റുമോ? ഉണ്ടന്നും ഇല്ലെന്നും ഉത്തരങ്ങൾ വരുമായിരിക്കും. പക്ഷേ, ഇരിക്കുന്ന സ്ഥാനം പഠനത്തിൽ വലിയ പങ്കുവഹിക്കുന്നുണ്ടെന്നാണ് വിദഗ്ധർ പറയുന്നത്. പഠനത്തിന് കൃത്യമായ ഒരു സ്ഥാനം നൽകുന്നത് തലച്ചോറിനുള്ള സിഗ്നൽ കൂടിയാണ്.

പഠനമുറി എവിടെ ക്രമീകരിക്കും. എങ്ങനെ ക്രമീകരിക്കും തുടങ്ങി പൊതുവായുണ്ടാകാവുന്ന സംശയങ്ങളും അവയ്ക്കുള്ള ഉത്തരങ്ങളും അറിയാം.

പഠനമുറിക്ക് അനുയോജ്യമായ സ്ഥാനം ഏതാണ്?

കുട്ടിയുടെ പ്രായമനുസരിച്ച് പഠനത്തിന് അനുയോജ്യമായ സ്ഥാനത്തിന് വ്യത്യാസം വരാം. ചെറിയ ക്ലാസുകളിൽ പഠിക്കുന്ന കുട്ടിയാണെങ്കിൽ പഠിക്കാൻ അച്ഛനമ്മമാരുടെ സഹായം വേണ്ടിവരും. അതുകൊണ്ടുതന്നെ അവർ കൂടുതൽ സമയം ചെലവിടുന്ന അടുക്കളയുടെയോ ഡൈനിങ് ഏരിയയുടെയോ അടുത്തു തന്നെ പഠിക്കാനുള്ള സ്ഥലം ക്രമീകരിക്കുന്നതാണ് നല്ലത്. ഇതിനു വേണ്ടി പ്രത്യേകമൊരു പഠനമുറി എന്നതിനു പകരം ഡൈനിങ് ടേബിളോ ഫാമിലി ലിവിങ് ഏരിയയിലെ മേശയോ പ്രയോജനപ്പെടുത്താം.

എന്നാൽ കൂട്ടി വളരുമ്പോൾ, അതായത്, ഒറ്റയ്ക്ക് പഠിക്കാൻ തുടങ്ങുമ്പോൾ തീർച്ചയായും സ്വകാര്യതയും ഏകാഗ്രതയും കിട്ടുന്ന സ്ഥലം തന്നെ വേണം. ഇരുനില വീടാണങ്കിൽ അപ്പർ ലിവിങ് ഏരിയയിൽ സ്റ്റഡി ഏരിയ ക്രമീകരിക്കുന്നതാണ് നല്ലത്. അപ്പർ ലിവിങ് ഏരിയയും താഴത്തെ നിലയുമായി പരസ്പരം ബന്ധപ്പെട്ടു കിടക്കുന്ന രീതിയിലാണ് പുതിയ വീടുകളെല്ലാം നിർമിക്കുന്നത്. താഴെ നിന്ന് വിളിച്ചാൽ കേൾക്കാം എന്നതാണ് അപ്പർ ലിവിങ്ങിൽ സ്റ്റഡി ഏരിയ ഒരുക്കുന്നതിന്റെ ഗുണം.

കിടപ്പുമുറിയിൽത്തന്നെ സ്റ്റഡി ഏരിയ നൽകുന്നതിൽ തെറ്റുണ്ടോ?

കിടപ്പുമുറിയിലെ സ്റ്റഡി ഏരിയ ചെറിയ കുട്ടികൾക്ക് അനുയോജ്യമല്ല. ഹയർ സെക്കന്ററി അല്ലെങ്കിൽ കോളജ് വിദ്യാർഥികൾക്ക് കിടപ്പുമുറിയിൽത്തന്നെ സ്റ്റഡി ഏരിയ ഒരുക്കാം. ചെറിയ കുട്ടികളുടെ മുറിയിലും സ്റ്റഡി ഏരിയയ്ക്ക് സൗകര്യമൊരുക്കണം. ഇവിടെ പഠനം എന്നതിലുപരി ബാഗും പുസ്തകങ്ങളും സ്ഥിരമായി ഒരിടത്ത് അടുക്കോടും ചിട്ടയോടും കൂടി വയ്ക്കാനുള്ള സൗകര്യമാണ് ഒരുക്കേണ്ടത്.