ആർക്കാണിത്ര ധൃതി

സുരക്ഷിത അകലംപോലെതന്നെ പ്രധാനമാണ് സുരക്ഷിത വേഗവും.

- കെ.ജി. ദിലീപ് കുമാർ എംവിഐ, എസ്ആർടിഒ പെരുമ്പാവൂർ

ജാൻ ഡി ബോണ്ട് സംവിധാനം ചെയ്ത "സ്പീഡ്' എന്ന സിനിമയിലെ, വേഗം കുറഞ്ഞാൽ പൊട്ടിത്തെറിക്കുന്ന ബസ്സിനെ ഓർമിപ്പിക്കുന്ന രീതിയിലാണ് ചിലരുടെയെങ്കിലും വിങ്. ഹോണടിച്ചും വെട്ടിച്ചുകയറ്റിയും കുതിച്ചുപായുന്ന ചിലർ. വേഗപരിധി എന്നാൽ അനുവദിക്കപ്പെട്ടതിന്റെ പരമാവധി ആണെന്ന തിരിച്ചറിവില്ലാതെ, പരിധിയിൽ സ്പീഡോമീറ്റർ മുട്ടിച്ചു പോകുന്നവർ.

"ഞാൻ ജീവിതത്തിൽ ചെയ്ത ഏറ്റവും വലിയ തെറ്റ്, സുഹൃത്ത് കാറിന്റെ വേഗം നൂറിന്റെ മുകളിലേക്ക് ഇരമ്പിക്കയറ്റിയപ്പോൾ, അവനോട് "അരുത്' എന്നു പറഞ്ഞില്ല എന്നുള്ളതാണ്, കോളജ് കുട്ടികളിലെ അപകടരഹിത വാഹന ഉപയോഗ ബോധവൽക്കരണത്തിനു വീൽ ചെയറിൽ എത്തിയതായിരുന്നു അദ്ദേഹം, ആക്സിഡന്റിന് ഇരയായവരുടെ അനുഭവം പങ്കുവയ്ക്കാൻ. അപകടം നടന്ന് രണ്ടു വർഷത്തോളം പിന്നിട്ടിരിക്കുന്നു. നെഞ്ചിനു താഴേക്കു തളർന്നുപോയ ശരീരം. ഇനിയും പൂർണ ചലനശേഷി വീണ്ടെടുത്തിട്ടില്ലാത്ത വിരലുകൾക്കിടയിൽ മൈക്ക് തിരുകിവച്ച് അദ്ദേഹം തുടർന്നു: 'സ്പൈനൽ കോഡ് എന്താണെന്നു മനസ്സിലാക്കുന്നതും അതിനു ശേഷമാണ്. ടോയ്ലറ്റിൽ പോയാൽ ശുചിയാക്കൽ മുതൽ പല്ലു തേപ്പിക്കുന്നതും ഭക്ഷണം വായിൽ വച്ചു തരുന്നതും അടക്കമുള്ള പ്രവൃത്തികൾ സ്വന്തം ഭാര്യയോ മാതാവോ ചെയ്യുന്നതു കണ്ടു കൊണ്ട് മൂളിയെത്തുന്ന കൊതുകിനെ നിർമമതയോടെ നോക്കി രക്തദാനത്തിനു തയാറായിക്കൊണ്ട്, അപകട നിമിഷത്തെ ആയിരം വട്ടം പഴിച്ചുകൊണ്ടുള്ള കിടപ്പ്... മറ്റുള്ളവരുടെ കരുണകൊണ്ടു മാത്രം മുന്നോട്ടുപോകുന്ന അനേക ലക്ഷം നിസ്സഹായ ജീവിതത്തിന്റെ താളിലേക്കു പേരെഴുതി ചേർക്കപ്പെട്ടവർ.

സുരക്ഷിത അകലം പോലെതന്നെ പ്രധാനമാണ് സുരക്ഷിത വേഗവും. ഭാരതത്തിൽ 2022ൽ മാത്രം 4,61,312 അപകടങ്ങ ളിൽ 1,68,491 പേർ കൊല്ലപ്പെട്ടു എന്നാണ് കേന്ദ്ര ഉപരിതല ഗതാഗത മന്ത്രാലയം പ്രസിദ്ധീകരിച്ച കണക്കുകൾ സൂചിപ്പിക്കുന്നത്. ഏകദേശം രണ്ടു വർഷം ആകാറായ യുക്രെയിൻ യുദ്ധത്തിൽ ഇതുവരെ കൊല്ലപ്പെട്ട സാധാരണക്കാരുടെ എണ്ണം പതിനായിരത്തോളമാണെന്നാണു യു.എൻ. പുറത്തുവിട്ട കണക്കുകൾ കാണിക്കുന്നത്. അതിന്റെ 16 മടങ്ങ് സാധാരണക്കാർ യുദ്ധം നടക്കാത്ത ഭാരതത്തിലെ നിരത്തുകളിൽ കൊല്ലപ്പെട്ടുകഴിഞ്ഞു.

ഈ റോഡ് അപകടങ്ങളുടെ കാരണം പരിശോധിക്കുമ്പോൾ 72.3% അപകടങ്ങളുടെയും 71.2% മരണങ്ങളുടെയും കാരണം ഓവർ സ്പീഡ് ആണ്. ദേശീയപാതയിലാണെങ്കിൽ അതു യഥാക്രമം 72.4%, 75.2% ആണ്.