કૃષ્ણની કર્મભૂમિને મળશે સિગ્નેચર બ્રિજના નામે નજરાણું...

અયોધ્યા નગરીમાં ભવ્ય રામ મંદિરના યોજાનારા પ્રાણપ્રતિષ્ઠા ઉત્સવનો દેશભરમાં ભારે ઉત્સાહ છે. બીજી તરફ, ગુજરાતમાં ભગવાન કૃષ્ણની કર્મભૂમિ માટે પણ એક નજરાણું રાહ જોઈ રહ્યું છે. ઓખાને બેટ દ્વારકા સુધી સમુદ્રમાર્ગે જોડતા સિનૅચર બ્રિજની તૈયારીને આખરી ઓપ અપાઈ રહ્યો છે.આવો જોઈએ, આ બ્રિજની શું છે ખાસિયત?

- પાર્થ સુખપરિયા

બ્રિજ પરથી દરિયાદેવનાં દર્શન માટે વૉક-વે અને વ્યૂઈંગ ગૅલરી, વૉક-વે પર બૅટરી સંચાલિત કાર, ભગવદ્ગીતાના શ્લોક કંડારેલા પથ્થર, વચ્ચે વચ્ચે કેટલાક સેલ્ફી પૉઈન્ટ, આખા બ્રિજ પરની ડેકોરેટિવ લાઈટ્સ માટે જરૂરી વીજ ઉત્પન્ન કરવા 300 જેટલી સોલાર પૅનલ્સ...આ છે ગુજરાતનો સૌથી લાંબો કૅબલ સ્ટેડ સિગ્નેચર બ્રિજ.

રાજકોટમાં એઈમ્સ હૉસ્પિટલ અને ઈન્ટરનૅશનલ ઍરપોર્ટ પછી સૌરાષ્ટ્ર ને કેન્દ્ર સરકાર દ્વારા ટૂંક સમયમાં વધુ એક નજરાણું મળવા જઈ રહ્યું છે. એ જ છે આ સિબ્નચર બ્રિજ. પાંચ વર્ષ સુધી કામ ચાલ્યા બાદ ઈજનેરી કૌશલ્યના ઉત્તમ નમૂનારૂપ આ બ્રિજ યાત્રાધામ બેટ દ્વારકાને જમીનમાર્ગે ઓખા સાથે જોડશે. બસ, હવે મુહૂર્ત નીકળે એની રાહ જોવાઈ રહી છે. આ મહિને જ વડા પ્રધાન નરેન્દ્ર મોદીના હસ્તે આ બ્રિજનું લોકાર્પણ કરાવવા ની તૈયારી ચાલી રહી છે.

દ્વારકાથી આશરે ૩૦ કિલોમીટરના અંતરે છે ઓખા. ઓખાના કિનારાથી બેટ દ્વારકા સુધી લોકો વર્ષોથી બોટ મારફત આવનજાવન કરે છે, પરંતુ હવે અહીં દરિયા પર બ્રિજ બન્યો છે. ભારતના બેનમૂન એવા આ સિઝ્નચર બ્રિજની વિશેષતા એ છે કે સવા બે કિલોમીટરથી પણ લાંબા આ ચારમાર્ગીય બ્રિજમાં ૯૦૦ મીટરનો હિસ્સો કૅબલ સ્ટેડ એટલે કે કૅબલથી લટકતો રહેશે. એનો નિર્માણખર્ચ છે આશરે ૯૭૮ કરોડ રૂપિયા.

ટેક્નિકલ ડિટેલ જોઈએ તો, આ બ્રિજ ૨૭ મીટર પહોળો છે. બ્રિજની બન્ને બાજુ લોકો પગપાળા જઈ શકે અને સાથે જ સમુદ્રની સુંદરતા માણી શકે એ માટે અઢી મીટરના બે વૉક-વેને ખાસ પ્રકારની ડિઝાઈનથી તૈયાર કર્યા છે. આ વૉક-વે પર બૅટરી સંચાલિત કાર પણ ચલાવવામાં આવશે. આ વૉક-વે પર ૨૯૮૬ સોલાર પૅનલની છત લગાવવામાં આવી છે, જેનાથી એક મેગા વોટ વીજળી ઉત્પન્ન થશે. આ બ્રિજની ડેકોરેટિવ લાઈટિંગની વીજળીની જરૂરત પૂરી થતાં જે વીજળી વધશે એ પશ્ચિમ ગુજરાત વીજ કંપની લિમિટેડ મારફત બેટ દ્વારકાને પૂરી પાડવામાં આવશે.

ગુજરાતના સૌથી લાંબા કૅબલ સ્ટેડ સિગ્નેચર બ્રિજના વૉક-વે સેક્શનની દીવાલ પર ભગવદ્ગીતાના શ્લોક કોતરેલા ૨૩૨ સ્ટોન લગાવવામાં આવ્યા છે. આ સ્ટોન જયપુરમાં ખાસ બનાવાયેલા છે. રાત્રિ દરમિયાન ડેકોરેટિવ લાઈટિંગ મૂકવામાં આવતાં બ્રિજ દીપી ઊઠે છે.