റിസർവ് ആസ്തിയായി ബിറ്റ്കോയിൻ ക്രിപ്റ്റോകൾക്ക് അംഗീകാരം കൂടുന്നു

ട്രംപിന്റെ നിയമങ്ങളും സ്ഥാപനനിക്ഷേപകർ കൂടുതലായി നിക്ഷേപം നടത്തുന്നതും ക്രിപ്റ്റോ കറൻസിക്ക് അനുകൂലമാണ്.

- 

ക്രിപ്റ്റോ കറൻസി മാർക്കറ്റിനെ സംബന്ധിച്ച് 2025 ഇതുവരെ അത്ര മികച്ച വർഷമായിരുന്നില്ല. ഡോണൾഡ് ട്രംപിന്റെ വരവോടെയുണ്ടായ താരിഫ് യുദ്ധം ആഗോള വിപണികൾക്കൊപ്പം ക്രിപ്റ്റോ കറൻസികളെയും ബാധിച്ചു. വിലയുടെ കാര്യം പരിഗണിക്കുമ്പോൾ മൂല്യത്തിൽ ഒന്നാമതായ ബിറ്റ്കോയിൻ മാത്രം ട്രംപ് അധികാരത്തിലേറിയ ജനുവരി ഇരുപതിനുശേഷം ഏകദേശം 18 ശതമാനത്തിലധികം ഇടിവു നേരിട്ടു. യുഎസ് മാർക്കറ്റിനൊപ്പം ബിറ്റ്കോയിന്റെ വിലയിലും തകർച്ച നേരിടുന്നുണ്ടെങ്കിലും അടിസ്ഥാനപരമായി ബിറ്റ്കോയിന് അനുകൂലമായ സാഹചര്യങ്ങളാണ് നിലനിൽക്കുന്നത്. കഴിഞ്ഞ വർഷത്തെപ്പോലെ സ്ഥാപന നിക്ഷേപകരുടെ എണ്ണം ഈ വർഷവും വർധിക്കുന്നതും ട്രംപ് സർക്കാരിനു കീഴിലുണ്ടാകുന്ന നിയമമാറ്റങ്ങൾ നിക്ഷേപകർക്കു പ്രോത്സാഹനമാകുന്നതും ശുഭസൂചകമാണ്.

ബിറ്റ്കോയിൻ റിസർവ് ആസ്തി

ട്രംപ് ഇലക്ഷൻ പ്രചാരണവേളയിൽ ക്രിപ്റ്റോ കറൻസിയിയെ സംബന്ധിച്ചു നടത്തിയ വാഗ്ദാനങ്ങളിൽ ഏറിയപങ്കും ഇതിനോടകം പാലിച്ചുകഴിഞ്ഞു. അതിലേറ്റവും പ്രധാനം ബിറ്റ്കോയിനെ റിസർവ് ആസ്തിയാക്കിക്കൊ ണ്ടുള്ള കരുതൽ ശേഖരം) എക്സിക്യൂട്ടീവ് ഉത്തരവു നടപ്പിലാക്കി എന്നതാണ്. ഒരു രാജ്യത്തോ സ്ഥാപനത്തിലോ നിർണായകമായ ഘട്ടങ്ങളിൽ സാമ്പത്തിക സുരക്ഷ ഉറപ്പാക്കുന്നതിനായി ഉപയോഗിക്കുന്ന ഒരു പ്രത്യേക ധനശേഖരമാണ് റിസർവ് ആസ്തി. ചരിത്രപരമായി അമേരിക്ക പോലുള്ള രാജ്യങ്ങൾ റിസർവായി ഉപയോഗിക്കുന്നത് സ്വർണമാണ്. അതുകൊണ്ടു തന്നെ ഡിജിറ്റൽ ആസ്തി എന്നനിലയിൽ ബിറ്റ്കോയിനു ലഭിക്കാവുന്ന ഏറ്റവും വലിയ സ്വീകാര്യതയാണിത്.