മക്കൾക്കായി ഇൻഷുറൻസും മ്യൂച്വൽഫണ്ടും; മറക്കരുത് ഇക്കാര്യങ്ങൾ

മക്കളുടെ വിദ്യാഭ്യാസം, തൊഴിൽ, ആരോഗ്യം, സുരക്ഷ എന്നിവയെക്കുറിച്ചെല്ലാം മാതാപിതാക്കൾക്ക് ആശങ്കയുണ്ടാവും. ഇതു മറികടക്കാൻ മികച്ച സാമ്പത്തിക പിന്തുണ വേണമെന്നും അവർ തിരിച്ചറിയുന്നു. അവിടെയാണ് കുട്ടികളുടെ നിക്ഷേപങ്ങളുടെ പ്രസക്തി. വൈവിധ്യമാർന്ന പദ്ധതികൾ ലഭ്യമാണെങ്കിലും ഇൻഷുറൻസിനും മ്യൂച്വൽ ഫണ്ടിനുമാണ് കൂടുതൽ ജനപ്രീതി.

- സുമ സണ്ണി

പൊതുവേ മലയാളി മക്കൾക്കായി ചൈൽഡ് ഇൻഷുറൻസ് പ്ലാനുകളാണ് തിരഞ്ഞെടുക്കു ക. പക്ഷേ, ഇവയെക്കുറിച്ചു പലർക്കും ശരിയായ ധാരണയില്ല. നിങ്ങൾ ലൈഫ് പോളിസി എടുക്കുന്നത് ആകസ്മികമായി എന്തെങ്കിലും സംഭവിച്ചാലും കുടുംബം സാമ്പത്തികമായി സുരക്ഷിതമാകണം എന്നു റപ്പാക്കാനാണ്. അതോടൊപ്പം കുട്ടിയുടെ ഓരോ പ്രായത്തിലുമുള്ള ആവശ്യങ്ങൾക്ക് പണം ഉറപ്പാക്കുന്ന ചൈൽഡ് പ്ലാനുകളും തിരഞ്ഞെടുക്കും.

പോളിസി ഉടമ മരിച്ചാൽ ചൈൽഡ് പ്ലാൻ അവസാനിക്കുമോ?

അങ്ങനെയൊരു തെറ്റിദ്ധാരണ പൊതുവേയുണ്ട്. എന്നാൽ കുട്ടിയുടെ ആവശ്യങ്ങൾക്കുള്ളതാണ് ഇവ. അതിനാൽ രക്ഷിതാവ് കൂടെയുണ്ടായാലും ഇല്ലെങ്കിലും പദ്ധതി ഈ ലക്ഷ്യം നിറവേറ്റും. ഒരു ചൈൽഡ് പ്ലാൻ കാലാവധി പൂർത്തിയാക്കിയാൽ വാഗ്ദാനം ചെയ്തിരിക്കുന്ന ആനുകൂല്യങ്ങൾ നൽകും. അതേ സമയം ഇടയ്ക്ക് രക്ഷിതാവ് മരിച്ചാൽ നിബന്ധനകൾ അനുസരിച്ചു കുട്ടിക്ക് ആനുകൂല്യങ്ങൾ ലഭിക്കും.

പ്രീമിയം അടയ്ക്കണോ?

രക്ഷാകർത്താവ് മരിച്ചാൽ പ്രീമിയം അടവ് കുടുംബാംഗങ്ങളുടെ ചുമലിൽ വരാം. അങ്ങനെയെങ്കിൽ ചൈൽഡ് പ്ലാൻ സാമ്പത്തികമായി ലാഭകരമാകില്ല. ഇതിനു പരിഹാരമായാണ് ഇൻഷുറൻസ് കമ്പനികൾ ചെൽഡ് പ്ലാനുകളിൽ നാമമാത്ര പ്രീമിയത്തിൽ റൈഡറുകൾ ലഭ്യമാക്കുന്നത്. ഇവകൂടി എടുത്താൽ രക്ഷാകർത്താവ് മരിച്ചാൽ പ്രീമിയം അടയ്ക്കേണ്ടതില്ല. ഗുരുതരമായ രോഗം, അപകടം എന്നിവമൂലം ജോലിചെയ്യാനാകാതെ വന്നാലും പ്രീമിയം ഒഴിവാക്കാനും റൈഡറുകൾ ഉപയോഗപ്പെടുത്താം.

ചില പ്ലാനുകളിൽ അത്തരം റൈഡറുകൾ ഇൻ-ബിൽറ്റായി ഉണ്ടാകും. അതിനാൽ പോളിസി തിരഞ്ഞെടുക്കും മുൻപ് റൈഡറുകൾ പ്രത്യേകമായി പരിഗണിക്കണം.

ഇൻഷുർ ചെയ്യുന്നത് രക്ഷാകർത്താവിന്