അൽപം കരുതൽ; ഹൃദ്രോഗം തടയാം

ഭക്ഷണക്രമം പാലിക്കുക, കൃത്യമായ വ്യായാമം, ആവശ്യത്തിനുള്ള ഉറക്കം, മാനസിക സമ്മർദം ലഘൂകരിക്കുക എന്നിവയിലൂടെ വലിയൊരു പരിധിവരെ ഹൃദയാഘാതം നമുക്കു തടഞ്ഞുനിർത്താൻ സാധിക്കും.

- ഡോ. ടി. കെ. ജയകുമാർ

ഹൃദയം മാംസപേശികൾ കൊണ്ട് ഉണ്ടാക്കിയിരിക്കുന്ന ഒരു അവയവമാണ്. ഹൃദയത്തിൽനിന്ന് ഈ മാംസപേശികൾക്കു വേണ്ട പോഷകങ്ങളും ഓക്സിജനും എത്തിക്കുന്ന രക്തക്കുഴലുകളെ ഹൃദയസൂക്ഷ്മധമനി അഥവാ കൊറോണറി ആർട്ടറീസ് (Coronary arteries) എന്നു വിളിക്കുന്നു. ഈ ധമനികൾ മഹാധമനിയിൽ നിന്ന് ആരംഭിച്ച് ഹൃദയത്തിനു പുറത്തുകൂടി സഞ്ചരിച്ച് ശരീരത്തിലെ മസിലുകളിലേക്ക് ആവശ്യമായ പോഷകങ്ങളും ഓക്സിജനും നൽകുന്നു. സൂക്ഷ്മധമനികൾക്ക് എന്തെങ്കിലും തടസ്സം നേരിട്ടാൽ ഹൃദയത്തിലെ മാംസപേശികളിലേക്കുള്ള രക്തപ്രവാഹം നിലയ്ക്കുകയും ഇതു വഴി ഈ പേശികൾക്കു നിലനിൽക്കാനാവശ്യമായ ഓക്സിജനും പോഷകങ്ങളും ലഭിക്കാതെ അവ നശിച്ചുപോകുകയും ചെയ്യുന്നു. കൊറോണറി ആർട്ടറീസിൽ ബ്ലോക്ക് ഉണ്ടായാൽ മാംസപേശികളിലേക്കുള്ള രക്തപ്രവാഹം പൂർണമായും നിലയ്ക്കും. ഈ അവസ്ഥയ്ക്കാണ് ഹൃദയാഘാതം എന്നു പറയുന്നത്. ഇന്ന് ലോകത്തിൽ ഏറ്റവും കൂടുതൽ മരണത്തിനു കാരണമാകുന്ന ഒരു അവസ്ഥയാണ് ഹൃദയാഘാതം.