കൊച്ചി മുതൽ കച്ച് വരെ ഒരു പജീറോ യാത

നോക്കെത്താദൂരത്തോളം പരന്നുകിടക്കുന്ന ഉപ്പു മരുഭൂമിയിലേക്കുള്ള യാത്ര... അധികം ആരും കടന്നുചെല്ലാത്ത ഗുജറാത്തിലെ കച്ച് വരെ 15 ദിവസത്തെ മിത്സുബിഷി പജീറോ റോഡ് ട്രിപ്

- റോഷ്നി. കെ

വിയറ്റ്നാം പോകേണ്ടിയിരുന്ന വിമാനം വഴിതിരിച്ചു വിട്ടതു പോലെയായിരുന്നു ദീപക്കിന്റെയും ശിൽപയുടെയും കച്ച് യാത്ര. കൊച്ചി ഇൻഫൊപാർക്കിലെ ഐടി ദമ്പതികളായ ഇരുവർക്കും വിയറ്റ്നാം പോയിവരാനുള്ള ലീവ് ഒത്തില്ല. പല പ്ലാനുകൾ മാറിമറിഞ്ഞാണ് കച്ച് എന്ന കച്ചിത്തുരുത്തിലെത്തിയത്. സഞ്ചാരികളുടെ സ്ഥിരം സ്ഥലങ്ങളിലൊന്നാണ് രാജസ്ഥാൻ. എന്നാൽ അധികം ആരും പോയിട്ടില്ലാത്ത വെളുത്ത മരുഭൂമിയിലേക്കു പോയാലോ എന്ന ചിന്ത ആരുടെയോ മനസ്സിൽ മിന്നി. ചുറ്റും ഉപ്പളങ്ങളാൽ വലയം ചെയ്ത, സ്വർഗത്തിലേക്കു പോകുന്ന റോഡാണ് കച്ചിലേത്. ഒരിക്കലെങ്കിലും കണ്ടിരിക്കേണ്ടയിടം എന്നാണ് അന്വേഷിച്ചപ്പോൾ സുഹൃത്തുക്കൾ അഭിപ്രായപ്പെട്ടത്. അങ്ങനെ ലക്ഷ്യം തീരുമാനമായി. ഇനി രഥം ഒരുക്കണം.

എന്തുകൊണ്ട് പജീറോ

കച്ച് യാത്രയിൽ കൂട്ടായത് 2009 മോഡൽ പജീറോ ആയിരുന്നു. എന്തുകൊണ്ട് പജീറോ എന്നു ചോദിച്ചാൽ അതെന്റെ പ്രാണനാണെന്ന് ദീപക് പറയും. അത്രയും ഇഷ്ടമാണ് മിത്സുബിഷിയുടെ ഈ ഭീമനെ. ഇതിലും ബെസ്റ്റ് വണ്ടി എവിടെകിട്ടാൻ? ദീപക്കിന്റെ പതിനേഴു വർഷത്തെ ക്രഷ്. സ്വന്തമാക്കണമെന്ന് ആഗ്രഹമുള്ള അത്രയേറെ ഇഷ്ടമുള്ള മോഡൽ. കുറെ മോഡലുകൾ കണ്ടിട്ടാണ് ഈ മോഡൽ ഉറപ്പിച്ചത്. 5 വർഷം മുൻപ് സ്വന്തമാക്കി. കൊല്ലം സ്വദേശികളാണ് ദീപക് വേലായുധനും ഭാര്യ ശിൽപ ശ്രീകുമാറും. ഇതിനു മുൻപ് ബന്ദിപ്പൂർ വരെ പജീറോയിൽ പോയിട്ടുണ്ട്. വഴിയിൽ കിടത്തിയിട്ടില്ല. പജീറോ എസ്എഫ്എക്സ് മോഡലാണ് ദീപക്കിന്റെ കയ്യിലുള്ളത്. ഡ്യുവൽ കളർ. എല്ലാ സർവീസും ചെയ്ത് പൂർണമായും കണ്ടീഷൻ ആക്കിയാണ് യാത്രയ്ക്ക് ഒരുക്കിയത്. ഇസിയു കൺട്രോൾ ഇല്ലാത്ത മോഡലായതിനാൽ സെൻസർ പ്രശ്നങ്ങൾ യാത്രയിൽ അലട്ടിയില്ല. ലെജൻഡറി പജീറോ ക്ലബ്ബിൽ അംഗമാണ് ദീപക്. രാജ്യത്ത് എവിടെ ചെന്നാലും സർവീസ് വേണമെങ്കിൽ ആ സംസ്ഥാനത്തുള്ള ക്ലബ് ഭാരവാഹികൾ സഹായിക്കും. അതു യാത്രയിൽ ഗുണം ചെയ്തു.

റൂട്ട് മാപ്