വാഹനങ്ങളും തീപിടിത്തവും

പഴയ വാഹനവും പുതിയ വാഹനവും കത്തിയമർന്നത് ഈയടുത്താണ്. എന്താണു കാരണം? വിശദമായി പരിശോധിക്കാം

- കെ. ശങ്കരൻകുട്ടി

കാറുകൾ തീപിടിച്ചു കത്തിനശിക്കുന്ന സംഭവങ്ങൾ തീരെ അപൂർവമല്ല. എങ്കിലും ഈയടുത്ത് പാലക്കാട്ട് കാറിനു തീപിടിച്ച് രണ്ടു കുഞ്ഞുങ്ങൾക്കു ജീവൻ നഷ്ടപ്പെട്ടത് എല്ലാ വാഹന ഉടമകളെയും ആശങ്കാകുലരാക്കുന്ന സംഭവമാണ്.

അപകടത്തിൽപെട്ട കാർ 2002 മോഡൽ ഫ്യുവൽ ഇൻജക്ഷൻ സംവിധാനമുള്ള കാർ ആണെന്നായിരുന്ന പ്രത റിപ്പോർട്ടുകൾ. രണ്ടു മാസമായി ഇത് ഉപയോഗിക്കുന്നില്ലായിരുന്നുവെന്നും പറയുന്നു. എന്തായാലും നിർത്തിയിട്ട കാർ എങ്ങനെ തീപിടിച്ചു എന്നത് പ്രത്യക്ഷത്തിൽ കുഴക്കുന്ന ഒരു ചോദ്യമാണ്. കൂടുതൽ ആഴത്തിൽ പരിശോധിച്ചാൽ ഈ അപകടത്തിനു വ്യക്തമായ ചില സാധ്യത കളുള്ളതായി കാണാം.

വില്ലൻ എഥനോൾ ചേർത്ത പെട്രോളോ?

2003 മുതൽ എഥനോൾ ചേർത്ത പെട്രോൾ കേരളത്തിൽ വിതരണം തുടങ്ങിയിരുന്നു. തുടക്കത്തിൽത്തന്നെ ഇതിന്റെ ചില ദോഷവശങ്ങൾ പലരും ചൂണ്ടിക്കാണിച്ചതാണ്. അതിൽ പ്രധാനമാണ് വാഹനത്തിൽ ഇന്ധനം കൈകാര്യം ചെയ്യുന്ന ഘടകങ്ങളിലെ റബർ, പ്ലാസ്റ്റിക് ഭാഗങ്ങൾക്കു ക്രമേണ ഉണ്ടാകാവുന്ന ക്ഷയിക്കൽ. ഫ്യുവൽ ഇൻജക്ഷൻ സംവിധാനത്തിൽ എൻജിനോടു ചേർന്ന ഭാഗങ്ങളിൽ റബർ ട്യൂബുകളും വാഷറുകളുമുണ്ട്. എഥനോൾ മിശ്രിതം ഉപയോഗിക്കാൻ പാകത്തിനു രൂപകൽപന ചെയ്ത കാറുകളിൽ ഈ ഘടകങ്ങൾ ആ നിലവാരത്തിൽ നിർമിക്കപ്പെട്ടവയാണ്. എന്നാൽ, അതിനു മുൻപു നിർമിക്കപ്പെട്ട വാഹനങ്ങളിൽ അതല്ല സ്ഥിതി.