ഇലക്ട്രിക് കരുത്തുമായി ക്രേറ്റ

473 കിലോമീറ്റർ റേഞ്ച്.കൂടിയ കരുത്ത് 171 ബിഎച്ച്പി. ടോർക്ക് 255 എൻഎം. വിപണിയിൽ പുതുചരിത്രമെഴുതാൻ ക്രേറ്റ വീണ്ടും

- സന്തോഷ്

ഹ്യുണ്ടയുടെ "ഇന്ത്യാചരിത്രത്തിലെ അവിസ്മരണീയമായ രണ്ടു മുഹൂർത്തങ്ങളാണ് സാൻട്രോയും ക്രേറ്റയും. ആദ്യ കാറെന്ന നിലയിലല്ല, പുതു മുഖമായെത്തിയ കൊറിയൻ കമ്പനിക്ക് അടിസ്ഥാനവും ജനപ്രീതിയുമേറ്റിയ വാഹനമെന്ന സ്ഥാനത്താണ് സാൻട്രോയുടെ നില. ക്രേറ്റയാകട്ടെ ഇന്ത്യയെ സെഡാനുകളിൽ നിന്ന് എസ്യുവികളിലേക്ക് പിടിച്ചുയർത്തിയ വാഹനമാണ്. ഇന്നു കാണുന്ന എവി ബാഹുല്യത്തിനു ക്രേറ്റയിലാണ് തുടക്കം. ഈ മുഹൂർത്തങ്ങളിലൊന്ന് ഇപ്പോൾ പുനർജനിക്കുന്നു. ഇലക്ട്രിക് കരുത്തിൽ ക്രേറ്റയുടെ രണ്ടാം വരവ്. വീണ്ടുമൊരു വിപ്ലവത്തിനു തുടക്കമായോ? വിശദമായ ടെസ്റ്റ് ഡ്രൈവ് റിപ്പോർട്ടിലേക്ക്.

ഇലക്ട്രിക് ഞങ്ങൾക്കു പുത്തരിയല്ല

ഇന്ത്യയിലെ ആദ്യ ഇലക്ട്രിക് വാഹനങ്ങളിലൊന്നായ കോനയും അത്യാധുനികനായ അയോണിക് ഫൈവുമൊക്കെയായി പണ്ടേ ഹ്യുണ്ടേയ് ഇലക്ട്രിക് സാന്നിധ്യമറിയിച്ചിട്ടുണ്ട്. ക്രേറ്റ ഇവിയിലൂടെ ഈ വിപണിയുടെ ടോപ് ഗിയറിലെത്തുകയാണ് ഉന്നം. സാങ്കേതികതയുടെ പരിപൂർണതയിലെത്തി നിൽക്കുന്ന ബാറ്ററിയും മോട്ടറും സോഫ്റ്റ് വെയറുമൊക്കെയായി ഇന്ത്യയിൽ ഇന്നുള്ള മറ്റ് ഇലക്ട്രിക് വാഹനങ്ങളിൽ നിന്നു വ്യത്യസ്തമാണ് ക്രേറ്റ. ലക്ഷ്യം, കോനയുടെ അടിസ്ഥാനമായ വിശ്വാസ്യതയും അയോണിക് ഫൈവിന്റെ ആധുനിക തയും കൂടുതൽ ജനകീയമായ ക്രേറ്റയിലെത്തിക്കുക. 2015 മുതൽ ഇന്ത്യയിൽ സജീവ സാന്നിധ്യമായ ക്രേറ്റയ്ക്ക് ഇലക്ട്രിക് വിപണി മാറ്റിമറിക്കാനാവുമെന്നാണ് പ്രതീക്ഷ.

ചൈനീസല്ല ആ ഹൃദയം

ഇലക്ട്രിക് വാഹനത്തിന്റെ ഹൃദയം ബാറ്ററിയാണെങ്കിൽ ഇന്ത്യയിലിന്നിറങ്ങുന്ന ഏതാണ്ടെല്ലാ ഇലക്ട്രിക്കുകളുടെയും ഹൃദയത്തുടിപ്പുകൾ ചൈനീസിലാണ്. എന്നാൽ ഹ്യുണ്ടേയ് സ്വന്തം ശാലയിൽ നിർമിച്ചെടുക്കുന്ന ബാറ്ററികളാണ് ഉപയോഗിക്കുന്നത്. സാങ്കേതികത യിലുമുണ്ട് മാറ്റം. ലിഥിയം ഫെറസ് ഫോസ്ഫേറ്റിനു (എൽഎഫ്പി) പകരം നിക്കൽ മാംഗനീസ് കോ ബാൾട്ട് (എൻഎംസി) ബാറ്ററികളാ ണ്. വലുപ്പം കുറവ്. വില തെല്ലു കൂടുമെങ്കിലും പെർഫോമൻസിൽ മികവുണ്ട്. റേഞ്ചും കൂടുതൽ. ഈടു കുറവാണെന്ന ആരോപണ ത്തെ നിഷ്പ്രഭമാക്കാൻ 8 കൊല്ലം, 160000 കിലോമീറ്റർ എന്ന വാറന്റി. ഇന്ത്യയിലിന്നിറങ്ങുന്ന ചില ഇലക്രിക്കുകൾക്ക് ഇത്ര ദീർഘമായ വാറന്റിയില്ല.

ക്രേറ്റയഴക്...