റെനോ ഡസ്റ്റർ തിരുമ്പിവന്തിട്ടേൻ

ആധുനിക ഡിസൈൻ, മികച്ച പവർ ട്രെയിൻ ഓപ്ഷനുകളുമായി റെനോ ഡസ്റ്റർ

- റോഷ്നി കെ.

തിരിച്ചുവരവെന്നു പറഞ്ഞാൽ ഒന്നൊര വരവായിപ്പോയി. കുറച്ചു വർഷം മുൻപുവരെ നിരത്തുകളിലെ താരമായിരുന്ന ഡസ്റ്ററിന്റെ മടങ്ങിവരവിനെ വളരെ ആഘോഷപൂർവമാണ് റെനോ വരവേറ്റത്. ഡാൻസ് സ്റ്റാർ പ്രഭുദേവയുടെ ചടുലായ സ്റ്റെപ്പുകളും ശിവമണിയുടെ ഡ്രംസും ചടങ്ങിനെ കൊഴുപ്പിച്ചു. പഴയ പേരുമാത്രമേ റെനോ സ്വീകരിച്ചിട്ടുള്ളൂ. കെട്ടിലും മട്ടിലും അടിമുടി മാറ്റങ്ങളുമായാണ് മൂന്നാം തലമുറ ഡസ്റ്റർ റെനോ അവതരിപ്പിച്ചത്.

ആധുനിക ഡിസൈൻ, മികച്ച പവർ ട്രെയിൻ ഓപ്ഷനുകളുമാണ് ഡസ്റ്ററിന്റെ തുറുപ്പുചീട്ട്. 21,000 രൂപയ്ക്ക് പ്രീ ബുക്കിങ് ചെയ്യാം. മാർച്ചിൽ വില പ്രഖ്യാപിക്കും.

പവർ ട്രെയിൻ

രണ്ട് ടർബോ പെട്രോൾ എൻജിൻ സ്ട്രോങ് ഓപ്ഷനുകളും ഒരു ഹൈബ്രിഡ് പെട്രോൾ എൻജിനും ആണ് ഡസ്റ്ററിൽ ഉണ്ടാവുക. 1.3 ലീറ്റർ പെട്രോൾ എൻജിന്റെ കരുത്ത് 163 എച്ച്പി. ടോർക്ക് 250 എൻഎം. 6സ്പീഡ് മാന്വൽ, 6-സ്പീഡ് ഡിസിടി ട്രാൻസ്മിഷൻ ഓപ്ഷനുകൾ ഉണ്ട്. 1.0 ലീറ്റർ ടർബോ പെട്രോൾ എൻജിന് 100 എച്ച്പി കരുത്തും 160 എൻഎം ടോർക്കും പുറത്തെടുക്കുന്നു. 6-സ്പീഡ് മാന്വൽ ടാൻസ്മിഷൻ ഗിയർബോക്സ് മാത്രമാ ണ് ഈ ചെറിയ എൻജിനിൽ ഉള്ളത്.