വരകൾക്കുമപ്പുറം

റോഡിലെ വെള്ള, മഞ്ഞ വരകൾ എത്രയോ തവണ കണ്ടിട്ടുണ്ടാകും. അവയുടെ പ്രധാന്യത്തെക്കുറിച്ച്...

- ദിലീപ് കുമാർ കെ.ജി. മോട്ടർ വെഹിക്കിൾ ഇൻസ്പെക്ടർ ആർടിഒ മലപ്പുറം.

'When insects can follow rules for laning, Why can't we, the humans?'

മനുഷ്യന്റെ തെറ്റുകളാണ് 90% അപകടങ്ങൾക്കും കാരണമെന്നാണ് വിലയിരുത്തപ്പെട്ടിട്ടുള്ളത്. അത് പെട്ടെന്നൊരു ദിവസം സംഭവിക്കുന്ന ഒന്നല്ല. അവ നിരന്തരമായ ശ്രദ്ധിക്കപ്പെടാതെ പോകുന്ന ചെറിയ ചെറിയ ഒഴിവാക്കലുകളുടെയും ചെറിയ അപകടങ്ങളുടെയും അന്തിമഫലമാണന്നുള്ള തിയറികൾ മുൻപേ ഉള്ളതാണ്. റോഡപകടങ്ങളെയും അതിന്റെ കാരണ ങ്ങളെയും പഠനവിധേയമാക്കി ഹെൻറിച്ച് (H.W. Heinrich) നടത്തിയ Industrial accident prevention: A scientific approach ഇത്തരത്തിൽപ്പെട്ട ഒന്നാണ്. ഈ പഠനത്തിന്റെ അടിസ്ഥാനത്തിൽ തയ്യാറാക്കപ്പെട്ട ഹെൻറിച്ച് ട്രയാംഗിൾ ഏറ്റവും പ്രസക്തമാകുന്നത് ട്രാഫിക്കുമായി ബന്ധപ്പെട്ടാണ്. താഴെത്തട്ടിൽ ശ്രദ്ധിക്കപ്പെടാതെ പോകുന്ന മുന്നൂറോളം ചെറിയ തെറ്റുകളുടെ ഉയർന്ന ശ്രേണിയിൽ വരുന്നതാണ് ഇരുപത്തൊൻപതോളം ചെറിയ അപകടങ്ങളും ഗുരുതരമായ പരുക്കിനോ മരണത്തിനോ കാരണമായേക്കാവുന്ന വലിയ അപകടവും.

ഹെൻറിച്ച് ട്രയാംഗിൾ

റോഡപകടങ്ങളെക്കുറിച്ച് ഇത്തരത്തിലുള്ള ആദ്യത്തേതും വിശദവുമായ പഠനവും വിലയിരുത്തലും നടത്തിയത് 2006ൽ ആണ്. “നാച്ചുറലിസ്റ്റിക് ഡ്രൈവിങ് ബിഹേവിയർ എന്ന ഈ പഠനത്തിൽ 69 അപകടങ്ങളും 761 ഒഴിവാക്കലുകളും (near crashes) 8295 അപകടത്തിലേക്കു നയിച്ചേക്കാവുന്ന ചലനങ്ങളും കണ്ടെത്തുകയുണ്ടായി. ഇത് ഹെൻറിച്ച് തത്വത്തിനെക്കാൾ ഉയർന്ന അനുപാതത്തിലുള്ളതാണ് (1:11:120). ഈ അപകട സാധ്യതകളെയും ചെറിയ ചെറിയ ഒഴിവാക്കലുകളെയും നാം നമ്മുടെ ദൈനംദിന ജീവിതത്തിൽ ശ്രദ്ധിക്കുന്നതേ ഇല്ല എന്നതാണ് സത്യം. നീണ്ട യാത്ര നിശേഷം തിരിഞ്ഞുനോക്കുമ്പോൾ റോഡിൽ നാം കണ്ട എത്ര കാര്യങ്ങൾ നമുക്ക് ഓർത്തെടുക്കാൻ കഴിയും. റോഡിൽ കണ്ട വരകളും സൈനേജുകളും നമ്മുടെ ഓർമയിൽ വരുന്നുണ്ടോ, 99% ഇല്ല എന്നായിരിക്കും ഉത്തരം. പത്തോ ഇരുപതോ വർഷത്തിനുശേഷം നമ്മുടെ യാത്രകളെ തിരിഞ്ഞു നോക്കിയാൽ, ഓർമയിൽ തങ്ങി നിൽക്കുന്നത് ചില മോശം റോഡ് അനുഭവങ്ങൾ മാത്രമാകാനാണ് സാധ്യത.