WOW VENUE

പ്രീമിയം എസ്യുവികളിലെ ഫീച്ചറുകൾ ചെറിയ എസ്യുവിയിലെത്തുമ്പോൾ...

- പ്രവീൺ

ഫസ്റ്റ് ഇൻ സെഗ്മെന്റ് അല്ലെങ്കിൽ ബെസ്റ്റ് ഇൻസെഗ്മെന്റ് ഇങ്ങനെ വിശേഷണമുളള ഫീച്ചേഴ്സ് ഓരോ ഹ്യുണ്ടായ് മോഡൽ ഇറങ്ങുമ്പോഴും നമ്മൾ കാണാറുണ്ട്. ഹ്യുണ്ടയുടെ ചെറിയ എസ് യുവി ആയ വെന്യുവിലും ഇങ്ങനെയാണു കാര്യങ്ങൾ. ആദ്യമോഡൽ തന്നെ ഹിറ്റായിരുന്നു, ക്രേറ്റയെപ്പോലെ. രണ്ടാം ഭാവത്തിൽ അതിസുന്ദരമായ രൂപകൽപനയും പുതുമയുള്ള ഫീച്ചറുകളും വെന്യുവിനുണ്ട്. 1.0 കാപ്പ ടർബോ ജിഡിഐ ഡിസിറ്റി മോഡലിൽ ഒന്നു കറങ്ങിവരാം.

രൂപകൽപന

ആകെ ചതുരമയ രൂപം. ചെറിയ മാറ്റങ്ങൾ കൊണ്ട് അദ്ഭുതം സൃഷ്ടിക്കുന്ന രീതിയിലാണ് രൂപകൽപന. ചതുരവടിവുള്ള ഗ്രില്ലിൽ നിറയെ ചതുരശൽക്കങ്ങൾ. അതിന്റെ തുടർച്ചയായി വിഭജിച്ച എൽഇഡി ഇൻഡിക്കേറ്ററുകളും പൈലറ്റ് ലാംപും. ബംപറിലെ കറുപ്പു ക്ലാഡിങ്ങും ദീർ ഘചതുരത്തിലാണ്. അലൂമിനിയം ഫിനിഷ് ഉള്ള സ്കിഡ് പ്ലേറ്റ്, മുൻ മോഡലിലെ എൽഇഡി പ്രോജക്ടർ ഹെഡ് ലാംപും അതിനെ ചുറ്റിയുള്ള ഡിആർഎലും മുൻമോഡലിലേതു തന്നെ.

വശങ്ങൾക്കു മാറ്റമില്ല. മിതമായ രീതിയിൽ മാത്രം ഉയർന്നുനിൽക്കുന്ന ഡോറുകൾ കയറാനും ഇറങ്ങാനും കൂടുതൽ എളുപ്പമുള്ളതാണ്. മുതിർന്നവർക്കാണ് ഇതിന്റെ പ്രയോജനം ഏറെ.

റിയർ ലാംപുകൾ എൽഇഡി ലൈൻ കൊണ്ട് ബന്ധിപ്പിക്കപ്പെട്ടിരിക്കുന്നു. ബംപറിലെ കറുപ്പു ക്ലാഡിങ്ങും രസകരം. വലിയ ടയറുകളും ഷോർട്ട് ഓവർഹാങ്ങുകളും (ടയറിൽ നിന്നു ബംപറിന്റെ അറ്റത്തേക്കുള്ള നീളം വെന്യുവിനെ ഏതു റോഡിനും പ്രിയപ്പെട്ടതാക്കും.