അടുക്കും ചിട്ടയുമുള്ള ബ്ലാസ്റ്റേഴ്സ്

ഇന്ത്യൻ സൂപ്പർ ലീഗ് ഫുട്ബോളിന്റെ നടപ്പുസീസണിൽ പ്രതീക്ഷപുലർത്താവുന്ന പ്രകടനമാണ് കേരള ബ്ലാസ്റ്റേഴ്സിൽ നിന്നുണ്ടാകുന്നത്. ഇതേ രീതിയിൽ മുന്നോട്ടു പോയാൽ ആരാധകർക്ക് നിരാശപ്പെടേണ്ടി വരില്ല

- അനീഷ് പി നായർ

ഇന്ത്യൻ സൂപ്പർ ലീഗ് ഫുട്ബോൾ എട്ടാം സീസണിലെ പകുതിയിലേറെ മത്സരങ്ങൾ കഴിയുമ്പോൾ മുംബൈ സിറ്റിയുടെ കുതിപ്പും കേരള ബ്ലാസ്റ്റേഴ്സിന്റെ സ്ഥിരതയോടെയുളള പ്രകടനവുമാണ് ശ്രദ്ധേയമാകുന്നത്. തുടർച്ചയായ രണ്ടാം സീസണിലും ബ്ലാസ്റ്റേഴ്സിനെ പരിശീലിപ്പിക്കു ഇവാൻ വുകോമാനോവിച്ചിന് ടീമിനെ പോയന്റ് പട്ടികയിൽ മുൻനിരയിൽ തന്നെ നിർത്താൻ സാധിക്കുന്നത് വലിയ കാര്യമാണ്.

മുൻവർഷങ്ങളിൽ നിന്ന് വ്യത്യസ്തമായി ബ്ലാസ്റ്റേഴ്സിന് അടുക്കും ചിട്ടയും കൈവന്നിട്ടുണ്ട്. മുംബൈക്കെതിരായ മത്സരത്തിൽ വലിയ മാർജിനിൽ തോറ്റെങ്കിലും ടീമിന്റെ ഇതുവരെയുള്ള പ്രകടനം ആരാധകരെ സന്തോഷിപ്പിക്കുന്നതാണ്. എട്ട് മത്സരങ്ങളിൽ അപരാജിതരായി മുന്നേറിയതിന് ശേഷമാണ് മുംബൈക്കെതിരേ തോൽവി പിണഞ്ഞത്. അതിന് മുമ്പുള്ള എട്ട് മത്സരങ്ങളിൽ ടീം ആധികാരികമായി കളിച്ചു.

ആദ്യ നാല് കളികളിൽ കൃത്യമായ ആദ്യ ഇലവനെ കണ്ടെത്താൻ പരിശീലകന് കഴിഞ്ഞിരുന്നില്ല. ഇവാൻ കലിയൂഷ്നിയെ മുന്നേറ്റത്തിൽ കളിപ്പിക്കേണ്ടിവന്നതും, വിദേശ സ്ട്രൈക്കർമാർ മങ്ങിപ്പോയതും പരിശീലകന് തലവേദന സൃഷ്ടിച്ചു. ആദ്യ മത്സരത്തിലെ തകർപ്പൻ ജയത്തിന് ശേഷം മൂന്ന് തുടർതോൽവികളിൽ ഉലഞ്ഞ ടീമിനെ യാണ് ഇവാൻ തിരിച്ചുകൊണ്ടുവ ന്നത്. തന്ത്രങ്ങൾക്കൊപ്പം ടീമിനെ പ്രചോദിപ്പിക്കാനുള്ള കഴിവാണ് പരിശീലകനെ വേറിട്ടുനിർത്തുന്നത്. കൊച്ചിയിലെ ജവഹർലാൽ നെഹ്റു സ്റ്റേഡിയത്തിൽ നിറഞ്ഞുകവിയുന്ന കാണികളെ മുൻനിർത്തി ഇവാൻ നടത്തിയ ഇമോഷണൽ ബ്ലാക്ക് മെയ്ലിങ്ങാണ് ടീമിന്റെ അത്മവീര്യം കൂട്ടിയത്. കാണികൾക്കായി കളിക്കാനും അവരെ നിരാശരാക്കരുതെന്നുമാണ് പരിശീലകൻ ആവശ്യപ്പെട്ടത്.