கோயில் ஒன்று... திருவடிவங்கள் எட்டு!

பழைமையும், புராணப் பெருமையும் வாய்ந்தது மயிலாடுதுறை மாவட்டத்தில் கோமல் என்ற ஊரிலுள்ள ஸ்ரீ ராஜகோபாலசுவாமி கோயில்.

- - சுஜாதா மாலி

ஒரு சமயம் கயிலையில் அரியும், அரனும் சொக்கட்டான் விளையாடிக்கொண்டிருந்தனர். அதற்கு அம்பிகை நடுவராகப் பொறுப்பேற்றார். விளையாட்டின் இறுதியில் தன் சகோதரனாகிய திருமால் வெற்றிபெற்றதாக அறிவித்து, ஈசனின் சாபத்துக்கு ஆளானார் அம்பிகை.

பின்னர், பசு வடிவம் தாங்கி கோரூபாம்பிகையாக சாபநிவர்த்தி வேண்டி பூலோகத்தில் அம்பிகை பூஜித்த காவிரிக்கரைத் தலங்கள் ஏராளம். அம்பிகையின் திருவடிகள் இத்தலங்களில் பட வேண்டும் என்கிற காரிய நிமித்தமாக நிகழ்த்தப்பட்ட ஈசனின் திருவிளையாடல் இது.

அம்மையுடன் ஏனைய சக்திகளும் பசு வடிவத்துடன் பூலோகத்தில் உலவிய போது, திருமாலும் 'கோஸஹர்' என்கிற மேய்ப்பர் வடிவந்தாங்கிய பாதுகாவலராக உடன் பயணித்து இருக்கின்றார்.

தற்காலத்தில் மயிலாடுதுறையை மையமாகக் கொண்டு அமைந்துள்ள ஏராளமான தலங்கள் இப்புராணக்கதையுடன் தொடர்புடையவை. அவற்றுள் ஒன்று, கோமல் ஸ்ரீ ராஜகோபாலசுவாமி கோயில்.

கோ + மால் - அதாவது கோ ஆகிய பசுவும், மால் ஆகிய திருமாலும் இணைந்து விளங்கிடும் தலம் ஆகையால் கோமால் என்று அழைக்கப்பட்ட தலம். பிற்காலத்தில் கோமல் ஆக மருவி விட்டது.

கிழக்கு நோக்கிய கோயில். காலத்தால் தொன்மையானது. பிரதான வாயிலைக் கடந்தால் மையக் கோயிலை அடைந்து விடலாம். கருவறையில் மையமாக ஸ்ரீதேவி, பூதேவி சமேத ஸ்ரீ வரதராஜப்பெருமாள், தனது தேவியருடன் சங்கு சக்ரதாரியாக நின்ற நிலையில் காட்சி தருவது அழகு.