தண்ணீர் வந்தும் சாகுபடியை தொடங்க முடியாமல் விவசாயிகள் தவிப்பு

தொடக்க வேளாண் கூட்டுறவு கடன் சங்கங்களிலும் நடைமுறைக்கு வந்துள்ள சிபில் ஸ்கோர் முறையால் கடன் கிடைப்பதில் சிக்கல் நிலவுவதால், காவிரியில் தண்ணீர் வந்தும், டெல்டா மாவட்டங்களில் சாகுபடி பணிகளைத் தொடங்க முடியாமல் விவசாயிகள் தவிக்கின்றனர்.

- நமதுநிருபர்

தஞ்சாவூர், ஜூன் 25: தொடக்க வேளாண் கூட்டுறவு கடன் சங்கங்களிலும் நடைமுறைக்கு வந்துள்ள சிபில் ஸ்கோர் முறையால் கடன் கிடைப்பதில் சிக்கல் நிலவுவதால், காவிரியில் தண்ணீர் வந்தும், டெல்டா மாவட்டங்களில் சாகுபடி பணிகளைத் தொடங்க முடியாமல் விவசாயிகள் தவிக்கின்றனர்.

கிராமங்களிலுள்ள தொடக்க வேளாண் கூட்டுறவு கடன் சங்கங்களில் விவசாயிகளுக்கு வட்டியில்லா பயிர்க்கடன் கிடைத்து வருகின்றன. நெல் சாகுபடிக்கு ஏக்கருக்கு ரூ. 38 ஆயிரம் கடன் கிடைக்கும். இதேபோல, மற்ற பயிர்களுக்கும் கடன் கிடைக்கிறது.

இதுவே, தனியாரிடம் குறைந்தது மூன்று வட்டி (36 சதவீதம்) என்ற அளவில்தான் விவசாயிகளுக்கு கடன் கிடைக்கும். சில கிராமங்களில் 5 வட்டி (60 சதவீதம்) என்ற அளவிலும் கடும் சுமைக்கு இடையே கடன் வாங்கும் சூழ்நிலை விவசாயிகளுக்கு ஏற்படுகிறது.

இதன் மூலம் சொத்துகளை இழந்த விவசாயிகள் ஏராளம். எனவே, வட்டியில்லா கடன் கிடைக்கும் தொடக்க வேளாண் கூட்டுறவு கடன் சங்கங்களைத்தான் விவசாயிகள் முழுமையாக நம்பியுள்ளனர்.