PAGASA: LPA nagdala'g kusog nga ulan

Magpadayun sa mga sunod nga adlaw ang mga pag- ulan sa Sugbo tungod sa Low Pressure Area (LPA) nga padayong nakaapekto sa Visayas, matud pa sa Philippine Atmospheric, Geophysical and Astronomical Services Administration (PAGASA).

- Jonnavie Villa/IBM

Sumala sa PAGASA, ang LPA maoy hinungdan sa panganurong kalangitan ug nagkatag nga pag-ulan ug mga panugdog ug kilat sa tibuok Visayas hangtod sa tunga-tunga sa semana.

Nagpasidaan usab ang state weather bureau nga ang kasarangan hangtod kusog nga pag-ulan mahimong mosangpot sa pagbaha sa ubos nga mga lugar ug pagdahili sa yuta sa mga kabukiran ug mga dapit nga delikado sa landslide.

Sa Weather Advisory No. 6 nga gipagawas alas- 5 sa hapon kagahapon, gipahibalo sa PAGASA nga adunay pipila ka probinsya nga gilauman makadawat og 50 ngadto sa 100 milimetrong ulan hangtod sa Hulyo 2.