ગર્લ્સ હોસ્ટેલ

બૈરાંની સાથે તમારે માત્ર જરૂર પૂરતું જ કામ. આ લોકો પેલા કારખાના વાળા આપતા એવી ગાળભેળ તો આપે નહીં. પાછી અંદર રહેતી છોરીઓ પણ હતી હોય. છોક્ટીઓ રહેતી હોય ત્યાં તમે કોઈ પુરુષને આવતો અટકાવો તો રસ્તે છતો અજાણ્યો પણ તમારું ઉપરાણું લે.

- રજનીકુમાર પંડ્યા

‘જો, એક વાત સમજી લો. આ ગર્લ્સ  હૉસ્ટેલ છે. અહીં કામ કરનાર કોઈ પણ ભાઈનું ચારિત્ર્ય શુદ્ધ સોના જેવું હોવું જોઈએ.’ ‘

એમાં મારે શું બોલવાનું હોય? આજે છત્રીસ વરસ થયાં. કોઈ સ્ત્રી સામે આંખ ઊંચી કરીને જોયું નથી. વિચાર પણ આવ્યો નથી. એટલે જ તો હૉસ્ટેલમાં જૉબનો ઈન્ટરવ્યૂ આવ્યો ત્યારે પત્નીએ જાતે જ પત્ર મારા હાથમાં મૂકેલો.  કહ્યું: ‘આમાં જઈ આવો.'

‘પણ આ તો ગર્લ્સ હૉસ્ટેલના વૉચમૅનની જૉબ છે!’ ‘

તો એમાં શું થઈ ગયું?’ પત્નીએ કહ્યું: ‘વંદના વેજિટેબલ પ્રોડક્ટ્સની જૉબમાં જે જફા હતી એવી આમાં નહીં હોય.’

વાત તો સાચી. એ કારખાનું હતું. મજૂરો મહિનામાં પંદર દિવસ હડતાલ પાડતા.

કારખાનાના ઝાંપે ભેગા થઈને પહેલાં કાન ફાડી નાખે એવા નારા લગાવતા. પછી તોફાન કરતાં  અંદર ઘૂસવા પ્રયત્ન કરે તો પણ મારે રોકવા પડે. એમાં જો કોઈ અંદર પેસી જાય તો શેઠનો મેમો આવી પડે. ન પેસવા દઉં તો પેલા મને ધક્કે ચડાવે. લાકડી ઉગામું તો એ લાકડી મને જ પડે. સાંજ પડ્યે આ રીતે પિસાઈ પિસાઈને હું સાવ છોતરા જેવો થઈ જતો. અંતે જૉબ ગયેલી જ.

‘એના કરતાં આ સારું.’ પત્ની બોલીઃ બૈરાંની સાથે તમારે માત્ર જરૂર પૂરતું જ કામ. આ લોકો પેલા કારખાનાવાળા તમને આપતા એવી ગાળભેળ તો આપે જ નહીં. પાછી અંદર રહેતી છોકરીઓ પણ ફફડતી હોય. છોકરીઓ રહેતી હોય ત્યાં તમે કોઈ પુરુષને આવતો અટકાવો તો રસ્તે જતો અજાણ્યો પણ તમારું ઉપરાણું લે. મને લાગે છે કે આના જેવી સહેલી બીજી એકેય જૉબ નહીં.’

વાત સાચી હતી. આપણે ડરવું ક્યારે પડે? આપણા મનમાં મેલ હોય તો. એ બાબતમાં આજ સુધી કોઈએ આંગળી ચીંધી નથી. સારા સારા માણસો નાં સર્ટિફિકેટો હતાં જ મારી પાસે. અને લો, હું સિલેક્ટ પણ થઈ ગયો.

આધેડ વયનાં ગૃહમાતા મધુકાન્તાબહેન ફરી બોલ્યાં: ‘હું શું કહું છું? ચારિત્ર્ય શુદ્ધ સોના જેવું હોવું જોઈએ.’

‘એમાં નહીં કહેવું પડે, બહેન.’ મેં કહ્યું: ‘હું પરણેલો બચરવાળ માણસ છું. મારી આ જૉબમાં પગાર વિશ્વાસનો જ હોય છે. સમજું છું.’

‘વિશ્વાસ એટલે?’ ગૃહમાતા બોલ્યાં: ‘હું ફરી ફરી ચારિત્ર્યની વાત પર ભાર મૂકું છું.’