രോഗമില്ലാത്ത രോഗികൾ

അനാവശ്യ ആശുപത്രി സന്ദർശനങ്ങളും ഗുണകരമല്ലാത്ത രീതിയിലുള്ള ചികിത്സ തേടലും അടിയന്തര ചികിത്സാ സംവിധാനങ്ങളുടെ ദുരുപയോഗവും ഒഴിവാക്കാൻ നാം ആത്മാർഥമായി പരിശ്രമിക്കേണ്ടതുണ്ട്...

- ഡോ. സുനിൽ പി.കെ

ഇക്കഴിഞ്ഞ ദിവസം ജനറൽ ഒ.പിയിലെ തിരക്കിനിടയിൽ കണ്ട ഒരു യുവാവിനോട് രോഗവിവരം അന്വേഷിച്ചപ്പോൾ കിട്ടിയ മറുപടി അൽപം അമ്പരപ്പിക്കുന്നതായിരുന്നു. "ഡോക്ടറേ, പനി ഉണ്ടോ എന്നൊരു സംശയം ഇത് ഒറ്റപ്പെട്ട സംഭവമൊന്നുമല്ല. എങ്കിലും ഒരു സർക്കാർ ആശുപത്രിയിലെ തിരക്കുള്ള ഒ.പിയിൽ മണിക്കൂറുകൾ ചെലവഴിച്ച് ഇത്തരം സംശയനിവാരണം നടത്തേണ്ട അടിയന്തര ആവശ്യമുണ്ടോ എന്ന ചോദ്യം പ്രസക്തമാണ്.

'അത്യാഹിതങ്ങൾ' വരിയായി നിരന്നുനിൽക്കുന്നത് കണ്ടിട്ടുണ്ടോ? ഇല്ലെങ്കിൽ നിങ്ങളുടെ അടുത്തുള്ള ഒരു സർക്കാർ ആശുപത്രിയിലെ അത്യാഹിത വിഭാഗത്തിൽ ചെന്നുനോക്കിയാൽ മതി. അത്യാഹിത വിഭാഗത്തിലെ ഡോക്ടർക്കുമുന്നിൽ 'അത്യാഹിത'ങ്ങളുടെ നീണ്ടനിര കാണാം. അക്കൂട്ടത്തിൽ നെഞ്ചുവേദനയുമായി വന്ന ഒരു ഹൃദയാഘാതകേസുണ്ടാവാം. അല്പം മുമ്പ് തുടങ്ങിയ ജലദോഷവും മാസങ്ങളായുള്ള പുഴുക്കടിയും എല്ലാം ഇക്കൂട്ടത്തിൽ എത്രയും പെട്ടെന്ന് ചികിത്സ ലഭിക്കാനുള്ള ത്വരയോടെ നിൽക്കുന്നവരുടെ "അത്യാഹിത'ങ്ങളാവും.

അതിന് പുറമേ വാഹനാപകടത്തിൽപെട്ടവരെയോ മറ്റ് അത്യാഹിതങ്ങളുമായി എത്തുന്നവരെയോ കൊണ്ടുവരുന്നവരുടെ ഒരു നിര തന്നെയുണ്ടാവും കാഷ്വാലിറ്റിയിൽ. എന്തായാലും ആശുപത്രിയിൽ വന്നതല്ലേ, ഡോക്ടറെ കണ്ടുകളയാം എന്ന ലാഘവബുദ്ധിയോടെ ഒരു തരത്തിലും അടിയന്തരമല്ലാത്ത അസുഖങ്ങളുമായി എത്തുന്നവരും കാഷ്വാലിറ്റിയിലെ ഡോക്ടറെ കാണാനുള്ള വരിയിൽ പങ്കുചേരുന്നു. തങ്ങളുടെ ജോലി സമയം കഴിഞ്ഞ് സാവകാശം ഡോക്ടറെ കാണാമല്ലോ എന്ന ചിന്തയോടെ രാത്രിസമയത്ത് അത്യാഹിത വിഭാഗത്തിൽ ചികിത്സ തേടുന്നവരും കുറവല്ല.

ആർക്കാണ് നഷ്ടം?