ഒഴിവുകാലത്തിന്റെ സുവിശേഷം

ജോലി അതി ന്റെതന്നെ ലക്ഷ്യമാകുന്നതിൽ നിന്ന് നമ്മെ മോചിപ്പിക്കുന്നത് ഇടവേളകളാണ്. സ്വയം വിലയിരുത്താനും സംസ്കരിക്കാനുമുള്ള സന്ദർഭങ്ങളാണവ

- 

തിരക്കിട്ട ജോലിക്കിടയിൽ ഇടവേളകൾ നല്ലതാണ്. ജോലിക്ക്  തന്നെ അവ കൂടുതൽ ഊർജം നൽകും. ഇടവേളകൾ കർമശേഷിക്ക് മൂർച്ചയുണ്ടാക്കും.

രണ്ട് മരംവെട്ടുകാർ. തടിമിടുക്കിലും തൊഴിൽശേഷിയിലും തുല്യർ. ഒരു വ്യത്യാസം മാത്രം: ഒരാൾ മുഴുനേരം പണിയെടുക്കും; മറ്റേയാൾ ഉച്ചക്ക് ഒരു മണിക്കൂർ പണിനിർത്തും.

പക്ഷേ, വൈകീട്ട് മടങ്ങുമ്പോൾ മുറിച്ച മരങ്ങളുടെ എണ്ണം തുല്യം. ഇതെന്താണിങ്ങനെ?

ഇടവേളയെടുത്തയാൾ പറഞ്ഞു: “വിശ്രമിക്കുന്നേരം ഞാൻ മഴു മൂർച്ച കൂട്ടുകയായിരുന്നു.' വിശ്രമമെന്നും ഒഴിവെന്നും നാം വിളിക്കുന്ന സമയത്തും സത്യത്തിൽ നാം മറ്റേതോ ജോലിയിലാവാം. വിനോദ യാത്രയിൽ, പ്രകൃതിനിരീക്ഷണത്തിൽ, ചിത്രമെഴുത്തിൽ, വായനയിൽ... എല്ലാം കർമശേഷിക്ക് മൂർച്ച കൂട്ടും, സർഗാത്മകമെങ്കിൽ.

കാര്യശേഷി വർധിപ്പിക്കുമെങ്കിലാണ്, കർമത്തിൽ നന്മയുടെ അംശം കൂട്ടുമെങ്കിലാണ്, ഒഴിവിന്റെ ഇടവേള സാർഥകമാകുന്നത്.