ബസാൾട്ട് എക്സ്

പ്രീമിയം ഇന്റീരിയറുമായി ബസാൾട്ടിന്റെ പുതിയ വേർഷൻ

- നോബിൾ എം. മാത്യു

2025ൽ 99% വളർച്ച നേടിയാണ് സിട്രോയെൻ 23 എന്ന ഫ്രഞ്ചു വാഹന നിർമാതാവ് ഇന്ത്യൻ വിപണിയിൽ മുന്നേറുന്നത്. മറ്റു നിർമാതാക്കളുമായി താരതമ്യം ചെയ്താൽ വിൽപനയിൽ വലിയ അക്കങ്ങളുടെ ഗമയൊന്നും അവകാശപ്പെടാനില്ലെങ്കിലും സെയിൽസിൽ പതിയെ വളർച്ച നേടാൻ ആകുന്നുണ്ട് സിട്രോയെന്നിന്. വിപണിയിൽ സജീവമാകുന്നതിന്റെ ഭാഗമായി പുതിയ സ്ട്രാറ്റജിയും സിട്രോയെൻ ആവിഷ്ക്കരിച്ചു. അതിന്റെ ഭാഗമായി നിലവിലെ മോഡലുകൾക്കെല്ലാം എക്സ് എന്ന വകഭേതവും കൊണ്ടു വന്നു. അത് ഫലം കാണുമെന്നാണ് ആദ്യ നോട്ടത്തിൽ പറയാനാവുക. എയർക്രോസ്, ബസാൾട്ട്, സി എന്നീ മോഡലുകൾക്കെല്ലാം എക്സ് വേരിയന്റുകളുണ്ട്. അതിൽ എസ് യു വിയുടെ തലയെടുപ്പും കൂപ്പെ ഡിസൈനിന്റെ മനോഹാരിതയും സമന്വയിക്കുന്ന ബസാൾട്ട് എക്സുമായൊന്നു കറങ്ങിയിട്ടു വരാം.

വേറിട്ട ലുക്ക്

സിട്രോയെന്നിന്റെ പ്രൊഡക്ട് ലൈനപ്പിൽ ഡിസൈൻ കൊണ്ട് വേറിട്ടു നിന്ന മോഡലാണ് ബസാൾട്ട്. കുറഞ്ഞ വിലയിൽ ഒരു എസ് യു വി കൂപ്പെ; ബസാൾട്ടിലൂടെ സിട്രോയെൻ ഒരുക്കിയിരിക്കുന്നത് അതാണ്. ലക്ഷ്വറി വിഭാഗത്തിൽ മാത്രം കണ്ടിരുന്ന എസ് യു വി കൂപ്പെ ഡിസൈൻ മിഡ്സ് എസ് യു വി വിഭാഗത്തിലേക്ക് അവതരിപ്പിച്ച് പുതിയൊരു മത്സരത്തിനു തുടക്കമിട്ട സിട്രോയെൻ ബസാൾട്ടിന്റെ എക്സ് വേരിയന്റിലൂടെ പ്രീമിയം സൗകര്യങ്ങളും നൽകുകയാണ്.

98 ശതമാനവും തദ്ദേശീയമായി നിർമിക്കുന്ന സിഎംപി പ്ലാറ്റ്ഫോമിലാണ് ബസാൾട്ട് എക്സിന്റെ ജനനം. സി എയർകോസ് അടക്കമുള്ള മോഡലുകൾ നിർമിച്ചിരിക്കുന്നതും ഇതേ പ്ലാറ്റ്ഫോമിൽ ത്തന്നെയാണ്. 180 എംഎം ആണ് ഗ്രൗണ്ട് ക്ലിയറൻസ്, വീൽബേസ് 2651 എംഎം.