ഡയറിയിൽ നിന്ന് നോട്ട്ബുക്കിലേക്ക്

വഴിവിളക്കുകൾ

- ഷാഹിന കെ. റഫീഖ്

റോഡ് മുറിച്ചു കടന്നാൽ സ്കൂളായിരുന്നു. ബെല്ലടിച്ചു കഴിയുമ്പോഴേക്കും വീട്ടിലെത്താവുന്ന ദൂരം. അവിടെ നിന്നു നാലാംക്ലാസിൽ പുതിയ സ്കൂളിലേക്ക് മാറി, ദൂരെയുള്ള കോൺവന്റ് സ്കൂൾ. കൂട്ടുകാരെ പിരിയുന്ന സങ്കടം ആദ്യമായി യൂണിഫോം ധരിച്ച് വാപ്പയുടെ കൂടെയുള്ള സ്കൂട്ടർ യാത്രയുടെ ആവേശത്തിൽ പെട്ടന്ന് മറന്നു. അക്ഷരങ്ങൾ കൂട്ടി വായിക്കാൻ തുടങ്ങിയപ്പോഴേക്കും പൂമ്പാറ്റയും ബാലരമയും ഒക്കെ വാപ്പ വാങ്ങിത്തന്നു. പുതിയ സ്കൂളിൽ ചേർന്നപ്പോൾ ഒരു കുഞ്ഞു ഡയറിയും തന്നു. ചുവന്ന ചട്ടയുള്ള, പേജുകളുടെ വക്കുകൾ ചുവപ്പു നിറത്തിലുള്ള ഒന്ന്. ഇന്ന ദിവസം ഇത്ര മണിക്ക് ഞാൻ പുതിയ സ്കൂളിൽ ചേർന്നു എന്ന് വാപ്പയുടെ കൈപ്പടയിൽ എന്റെ ആദ്യ ഡയറിയിലെ ആദ്യ കുറിപ്പ്. ഓരോ ദിവസത്തേയും വിശേഷങ്ങൾ എഴുതി വയ്ക്കണമെന്ന് പറയുകയും ചെയ്തു. അത് പിന്നീട് ഒരു ശീലമാവുകയായിരുന്നു. കോളജിലൊക്കെ എത്തുമ്പോഴേക്കും ഈ എഴുത്ത് വലിയ ഒരനുഷ്ഠാനം പോലെ ആയി മാറിയിരുന്നു.