ഡിജിറ്റൽ അറസ്റ്റ് എന്ന തട്ടിപ്പ്

സൈബർ ക്രൈം

- ഇ. എസ്. ബിജുമോൻ സൈബർ ഫൊറൻസിക് ആൻഡ് ഇൻവെസ്റ്റിഗേറ്റിങ് എക്സ്പെർട്ട്

സൈബർ ലോകത്ത് വർധിച്ചു വരുന്ന ഭീഷണികളിലൊന്നാണ് "ഡിജിറ്റൽ അറസ്റ്റ്. സാധാരണക്കാരെ ഭയപ്പെടുത്തി പണം തട്ടാൻ സൈബർ കുറ്റവാളികൾ ഉപയോഗിക്കുന്ന ഏറ്റവും പുതിയ തന്ത്രമാണിത്. ഡിജിറ്റൽ അറസ്റ്റ് എന്ന പേരിൽ നടക്കുന്ന സൈബർ തട്ടിപ്പ് ഇന്ത്യയിലുടനീളം വ്യാപകമായി റിപ്പോർട്ട് ചെയ്യപ്പെടുന്നുണ്ട്. സാധാരണക്കാരായ വീട്ടമ്മമാർ മുതൽ ഉന്നത ഉദ്യോഗസ്ഥർ വരെ ഇത്തരം തട്ടിപ്പുകാരുടെ കെണിയിൽ അകപ്പെടുന്നുണ്ട്. ഡിജിറ്റൽ അറിവിനെക്കുറിച്ചും അതിൽ നിന്ന് എങ്ങനെ രക്ഷപ്പെടാം എന്നതിനെക്കുറിച്ചും പൊതുജനം അറിഞ്ഞിരിക്കേണ്ടതുണ്ട്.

എന്താണ് ഡിജിറ്റൽ അറസ്റ്റ്

പൊലീസ്, സിബിഐ, നർക്കോട്ടിക്സ് കൺട്രോൾ ബ്യൂറോ, ഇ.ഡി തുടങ്ങിയ ഉന്നത അന്വേഷണ ഏജൻസികളിലെ ഉദ്യോഗസ്ഥരാണെന്ന വ്യാജേന തട്ടിപ്പുകാർ നിങ്ങളെ ഫോണിലൂടെയോ വിഡിയോ കോളിലൂടെയോ ബന്ധപ്പെടുന്നു. നിങ്ങളുടെ പേരിൽ നിയമവിരുദ്ധമായ പാഴ്സലുകൾ വന്നിട്ടുണ്ടന്നോ അല്ലെങ്കിൽ നിങ്ങൾ ഒരു ക്രിമിനൽ കേസിൽ പ്രതിയാണെന്നോ പറഞ്ഞ് അവർ നിങ്ങളെ ഭയപ്പെടുത്തുന്നു. അന്വേഷണം കഴിയുന്നതു വരെ വീടിനു പുറത്തിറങ്ങാനോ മറ്റാരോടും സംസാരിക്കാനോ പാടില്ലെന്നു പറഞ്ഞ് മണിക്കൂറുകളോളം വിഡിയോ കോളിൽ നിങ്ങളെ തളച്ചിടുന്നു. ഇതിനെയാണ് "ഡിജിറ്റൽ അറസ്റ്റ്' എന്നു വിളിക്കുന്നത്. മണിക്കൂറുകളോളം അല്ലെങ്കിൽ ദിവസങ്ങളോളം വിഡിയോ ക്യാമറയ്ക്കു മുന്നിൽ ഇരിക്കാൻ അവർ നിങ്ങളെ നിർബന്ധിക്കുന്നു. ഈ സമയത്ത് ആരോടും സംസാരിക്കാൻ അവർ അനുവദിക്കില്ല.