പ്രായത്തിന്റെ കളി

കഥക്കൂട്ട്

- തോമസ് ജേക്കബ്

ജി.എൻ.എൻ. പണിക്കർ മുപ്പതാം വയസ്സിലെഴുതിയ കഥയാണ് "നര. റിട്ടയർ ചെയ്ത ഒരധ്യാപകൻ അത് ഓർക്കാതെ പിറ്റേന്നു ക്ലാസ് എടുക്കാൻ ചെല്ലുന്നതാണു കഥ.

ഓർമയ്ക്കു കുഴപ്പമൊന്നുമില്ലായിരുന്നെങ്കിലും വിരമിച്ചശേഷം മഹാകവി ജി. ശങ്കരക്കുറുപ്പ് വല്ലപ്പൊഴും മഹാരാജാസ് കോളജിൽ വരുമായിരുന്നെന്നും ചിലപ്പോൾ ക്ലാസ് എടുക്കുമായിരുന്നെന്നും ഡോ. എസ്.കെ. വസന്തൻ എഴുതിയിട്ടുണ്ട്.

പ്രധാനമന്ത്രിപദം ഒഴിഞ്ഞ് രണ്ടു വർഷം കഴിഞ്ഞപ്പോൾ മൻമോഹൻ സിങ് വീണ്ടും അധ്യാപകവേഷമണിഞ്ഞു. പഞ്ചാബ് സർവകലാശാലയിൽ നിന്ന് സാമ്പത്തികശാസ്ത്രത്തിൽ ബിരുദവും ബിരുദാനന്തരബിരുദവും എടുത്തശേഷം അവിടെ പഠിപ്പിച്ചിരുന്ന മൻമോഹൻ സിങ് 2016ൽ അവി ടെത്തന്നെ കൊല്ലത്തിൽ ഒരാഴ്ച വീതം പഠിപ്പിക്കാനെത്തി.

രാഷ്ട്രപതിയായിരുന്ന ഡോ. എ.പി.ജെ.അബ്ദുൽ കലാമിന്റെയും ഇഷ്ടമേഖല അധ്യാപനമായിരുന്നു. രാഷ്ട്രപതിപദത്തിൽ നിന്നു വിരമിച്ച അദ്ദേഹം 2007ൽ അ ണ്ണാമലൈ സർവകലാശാലയിൽ പ്രഫസറുടെ കുപ്പായമണിഞ്ഞിട്ടുണ്ട്.

കലാമിന് അവസാനകാലത്ത് ഒഴിച്ചുകൂടാൻ വയ്യാത്ത ഒരു സംഗീതോപകരണമായിരുന്നു വീണ. അറുപതു വയസ്സിനുശേഷമാണ് അദ്ദേഹം വീണ വായിക്കാൻ പഠിച്ചതെന്നു വിശ്വസിക്കാൻ കഴിയില്ല.

നക്സലൈറ്റ് നേതാവ് അജിതയുടെ മാതാവ് മന്ദാകിനി നാരായണൻ പാട്ടും ചിത്രരചനയും പഠിച്ചു തുടങ്ങിയത് ജീവിതാവസാനത്തിലെ അഞ്ചു വർഷങ്ങളിലാണ്.