എനിക്കു നല്ലൊരു നടിയാകണം

'ഒരേ കടൽ' എന്ന സിനിമയിൽ മീരാജാസ്മിൻ അഭിനയിക്കുന്നതു കണ്ടു നടിയാകാൻ ആഗ്രഹിച്ച കുട്ടിയാണു ശിവകാമി ശ്യാമപ്രസാദ്

- വി.ആർ. ജ്യോതിഷ്

മുത്തച്ഛൻ ഒ.രാജഗോപാൽ മുൻ കേന്ദ്രമന്ത്രിയും അറിയപ്പെടുന്ന രാഷ്ട്രീയനേതാവും, അചൻ ശ്യാമപ്രസാദ് ദേശീയ അവാർഡ് ജേതാവും ധാരാളം നല്ല സിനിമകളുടെ സംവിധായകനും, ചേട്ടൻ വിഷ്ണു സിനിമാനിർമാതാവും സംവിധായകനും. അമ്മ ഷീബാ ശ്യാമപ്രസാദ് ബാങ്ക് ഉദ്യോഗസ്ഥയും കലാകാരിയുമായിരുന്നു. ഇങ്ങനെയൊക്കെയാണെങ്കിലും സിനിമയിലെത്താൻ വൈകിയോ എന്നു ചോദിച്ചപ്പോൾ ശിവകാമി പറഞ്ഞു; "എല്ലാത്തിനും അതിന്റേതായ സമയമുണ്ടല്ലോ ദാസാ ....

ലോക കണ്ടവർ ശിവകാമിയുടെ രൂപ എന്ന കഥാപാത്രത്തെ മറക്കാനിടയില്ല. അനായാസമായ അഭിനയ ശൈലിയുള്ള നടി മാത്രമല്ല ശിവകാമി. നല്ലൊരു ഗായികയും തിയറ്റർ ആർട്ടിസ്റ്റും കൂടിയാണ്.

കുട്ടിക്കാലം മുതൽക്കേ സിനിമയുടെ വീട്ടിലാണല്ലോ?

കലാപ്രവർത്തകരും ചർച്ചകളും ഒക്കെ നിറയെയുണ്ട് കുട്ടിക്കാല ഓർമകളിൽ ദൂർദശനിലെ അച്ഛന്റെ സഹപ്രവർത്തകർ, നാടക കലാകാരന്മാർ, സിനിമയുടെ വിവിധ മേഖലകളിൽ നിന്നുള്ളവർ. പല റിഹേഴ്സലുകൾക്കും അമ്മയും ചേട്ടനും ഞാനും സാക്ഷിയാണ്.

ഈ രംഗത്തു പൂർണമായും മുഴുകുന്ന അച്ഛനെ എനിക്കന്നു കണ്ടു പഠിക്കാൻ കഴിഞ്ഞു. അച്ഛന്റെ പല ടെലി ഫിലിമുകൾക്കും സിനിമകൾക്കും അമ്മയും ഞാനും ഡബ് ചെയ്തിട്ടുണ്ട്. ചേട്ടൻ വളരെ വേഗം തന്നെ അച്ഛന്റെ വഴിയേ നടന്നു. സ്കൂളിൽ പഠിക്കുമ്പോൾ തന്നെ ഷോർട് ഫിലിം സംവിധാനം ചെയ്ത് ദേശീയ തലത്തിൽ അംഗീകാരം നേടി.

എന്നിട്ടും എന്താണു ലോക വരെ കാത്തിരുന്നത്

എനിക്കു പത്തു വയസ്സ് ഉള്ളപ്പോഴാണ് അച്ഛൻ സംവിധാനം ചെയ്ത ഒരേ കടൽ' സിനിമ നടക്കുന്നത്. ലൊക്കേഷനിൽ ചെന്നപ്പോൾ മീര ജാസ്മിന്റെ അഭിനയം നേരിൽ കണ്ടു. അപ്പോൾ തോന്നി എനിക്കുമൊരിക്കൽ നടിയാകണം. സത്യത്തിൽ ഒരേ കടൽ' ആണു സിനിമ എന്ന വിത്ത് മനസ്സിലിട്ടു തന്നത്. പിന്നീടുള്ള സിനിമകളിൽ അച്ഛനും പരിഗണിച്ചില്ലേ? ഞാനങ്ങനെ ഒരാഗ്രഹം ആരോടും പ്രകടിപ്പിച്ചിരുന്നില്ല എന്നതാണ് വാസ്തവും. 'ഋതു' സിനിമയുടെ സെറ്റിൽ ഞാൻ സജീവമായി ഉണ്ടായിരുന്നു. ലൊക്കേഷനിലേ ക്ക് അതിരാവിലെ തന്നെ പോകണം. പക്ഷേ, എനിക്കതിനു വലിയ ഉത്സാഹമായിരുന്നു. അതു കാണുമ്പോൾ അമ്മ പറയും. 'പരീക്ഷയുടെ തലേന്നു പോലും രാവിലെ എഴുന്നേൽക്കാൻ മടിയുള്ളവളാണ്. ലൊക്കേഷനിൽ പോകാൻ എന്തൊരു ഉത്സാഹമാണ്.