മജ്ജ മാറ്റിവയ്ക്കൽ ഒരേ ജീവനിൽ രണ്ടു മനുഷ്യൻ

മജ്ജ മാറ്റിവയ്ക്കലിലൂടെ ജീവിതത്തിലേക്കു തിരികെയെത്തിയ ആദിയും മജ്ജ ദാനം ചെയ്ത വിഷ്ണുവും തമ്മിൽ കണ്ടപ്പോൾ

- വി.ആർ. ജ്യോതിഷ്

മോഹൻലാൽ പഠിച്ച തിരുവനന്തപുരം എം. ജി. കോളജിലെ അതേ ക്യാംപസ്. അവിടെ എൻസിസിയുടെ ക്യാംപ് നടക്കുന്നു.

(കാലം 2015) ക്യാംപിലെ കുട്ടികളിലൊരാളായിരുന്നു തിരുവനന്തപുരം വട്ടപ്പാറ മൊട്ടമൂട് വൈഷ്ണവത്തിൽ വേണുഗോപാലൻ സീനാകുമാരി ദമ്പതികളുടെ മകൻ വിഷ്ണു. മൂലകോശം ദാനം ചെയ്യാനുള്ള സന്നദ്ധത അറിയിച്ച് സമ്മതപത്രത്തിൽ ഒപ്പിടുകയാണ് കുട്ടികൾ. വിഷ്ണുവും "ദാത്രി ബ്ലഡ് സ്റ്റെം സെൽ ഡോണർ റജിസ്ട്രി'യുടെ ഭാഗമായി. വർഷങ്ങൾ കാറ്റു പോലെ കടന്നു പോയി.

(കാലം 2023) ഇൻഫോസിസ് തിരുവനന്തപുരം ഓഫിസിൽ ഫിനാൻഷ്യൽ അനലിസ്റ്റാണ് ഇപ്പോൾ വിഷ്ണു. ഭാര്യ അമൃത പിജിക്കു പഠിക്കുന്നു. ഒരു ദിവസം ദാതി ബ്ലഡ് സ്റ്റം സെൽ ഡോണർ റജിസ്ട്രിയിൽ നിന്നു വിഷ്ണുവിനു ഫോൺ കോൾ വന്നു. രക്താർബുദം ബാധിച്ച ഒരു കുട്ടിക്കു മജ്ജ മാറ്റിവയ്ക്കൽ മാത്രമേ രക്ഷയുള്ളു. വിഷ്ണുവിന്റെ മൂലകോശങ്ങൾ ആ കുട്ടിക്കു യോജിക്കും. ആ ജീവനു മരണത്തിൽ നിന്നു ജീവിതത്തിലേക്കു നടക്കാനുള്ള പാലമാണു താനെന്നു തിരിച്ചറിഞ്ഞു.

ദാത്രിയിൽ നിന്നുള്ള നിർദേശമനുസരിച്ചു വിഷ്ണു കൊച്ചി അമൃത ആശുപത്രിയിലെത്തി. ഒരാഴ്ച നീണ്ട ഡൊണേഷൻ പ്രൊസീജിയർ പൂർത്തിയാക്കി. മജ്ജ ദാനം ചെയ്തതെന്ന് ആർക്കെന്നോ സ്വീകരിച്ചത് ആരെന്നോ രണ്ടുവർഷത്തേക്കു വെളിപ്പെടുത്തരുതെന്നാണു നിയമം.

ആ കാലയളവു പിന്നിട്ടപ്പോൾ ദാത്രി മുൻകയ്യെടുത്ത് എംജി കോളജ് ക്യാംപസിലാണ് ആ കൂടിക്കാഴ്ച ഒരുക്കിയത്. ദാതാവായ വിഷ്ണുവും സ്വീകർത്താവായ ആദിനാരായണനും അന്നാദ്യമായി നേരിൽ കണ്ടു. യാത്രപറഞ്ഞു പിരിയുമ്പോൾ ഒരു ദിവസം വീട്ടിലേക്കു വരാമെന്നു വിഷ്ണു പറഞ്ഞിരുന്നു. 'വനിത' ഒരുക്കിയ ആ സമാഗമത്തിന്റെ നിമിഷങ്ങളിലൂടെ.

ആകാശം കാണാവുന്ന വീട്

(2025 നവംബർ 20) അഞ്ചൽ - അഗസ്ത്യക്കോട് ദേവീക്ഷേത്രത്തിനടുത്തു കുശിനിമുക്ക് - നെടിയറ റോഡ്. അവിടെയാണു രക്താർബുദത്തെ തുടർന്നു മജ്ജ മാറ്റിവച്ചു ജീവിതത്തിലേക്കു തിരികെയെത്തിയ പതിനേഴുകാരൻ ആദി നാരായണന്റെ ശ്രീമംഗലം വീട്. വിഷ്ണു വരുന്നു എന്നറിഞ്ഞപ്പോൾ കുടുംബാംഗങ്ങളും അയൽക്കാരുമെല്ലാം നേരത്തെ തന്നെ വീട്ടിലെത്തി.

വീട്ടിലേക്കു വന്നതും ആദിയുടെ അമ്മ ദിവ്യ വിഷ്ണുവിന്റെ കൈകൾ ചേർത്തു പിടിച്ചു ചുറ്റും നിന്നവർക്കു പരിചയപ്പെടുത്തി ; "എന്റെ കുഞ്ഞിനു ജീവൻ പകുത്തു കൊടുത്തവനാണ്. എന്റെ മകനാണ്.