ഉയരങ്ങൾ തേടി പല നാടുകളിലൂടെ..

ഈ പാട്ടുവരികളിലുണ്ട് ശാന്തി ബാലചന്ദ്രന്റെ ജീവിതയാത്ര

- വി.ആർ. ജ്യോതിഷ്

ലോക സിനിമാപരമ്പരയി ലെ ആദ്യ സിനിമ 'ചന്ദ്ര ചാപ്റ്റർ ഒന്ന്' തുടങ്ങുന്നതു തീയിൽ എരിയുന്ന നഗരദൃശ്യത്തിലാണ്. നായികയായ കല്യാണിയോടൊപ്പം മാധ്യമശ്രദ്ധ നേടിയ മറ്റൊരാൾ കൂടിയുണ്ട്. സിനിമയുടെ സഹതിരക്കഥാകൃത്ത് ശാന്തി ബാലചന്ദ്രൻ. വനിതയുടെ കൊച്ചിയിലെ സ്റ്റുഡിയോ ഫ്ലോറിൽ ശാന്തിയുടെ ഫോട്ടോഷൂട്ടിലെ ഒരു ചിത്രത്തിനും പശ്ചാത്തലമായത് അഗ്നിനാളങ്ങളുടെ ശോഭ.

ഓക്സ്ഫഡ് യൂണിവേഴ്സിറ്റിയിൽ ആറു വർഷത്തെ പഠനശേഷം നാടകത്തിലും പിന്നീട് സിനിമയിലും എത്തിയ ജീവിതകഥ പറയുന്നു ശാന്തി ബാലചന്ദ്രൻ.

ഓക്സ്ഫഡിലെ പഠനശേഷം സിനിമ ?

സ്വപ്നങ്ങൾക്കു പിറകേ സഞ്ചരിക്കുക മനോഹരമല്ലേ? ഓക്സ്ഫഡിൽ ഞാൻ എത്തിപ്പെടുകയായിരുന്നു. എന്റെ ജീവിതത്തിലെ ഏറ്റവും സുന്ദരമായ ആറേഴുവർഷങ്ങൾ. അതു പോലെ തന്നെ സിനിമയിലും എത്തിപ്പെടുകയായിരുന്നു. അതു മറ്റൊരു സ്വപ്നം. പക്ഷേ, എല്ലാത്തിനും പിന്നിൽ നല്ല കഠിനാധ്വാനം ഉണ്ടായിരുന്നുവെന്നതാണ് സത്യം.

ശാന്തി എന്ന പേരിലുമുണ്ട് ഒരു പ്രത്യേകത?

ഞാൻ ജനിക്കുന്നതിനു മുൻപേ അച്ഛൻ കണ്ടുവച്ച പേരാണ്. അച്ഛന് ഈ പേരിനോട് എന്തോ ഒരു ഇഷ്ടം ഉണ്ടായിരുന്നു. തീരെ ചെറുപ്പത്തിൽ എന്റെ അമ്മൂമ്മ പറയുമായിരുന്നു “നിന്റെ പേരിലെങ്കിലും കുറച്ചു ശാന്തത ഉണ്ടാവട്ടെ എന്നു വിചാരിച്ചാ അങ്ങനെ പേരിട്ടത്' എന്ന്. എനിക്ക് അനുജനുണ്ടായപ്പോൾ അച്ഛൻ സന്ദീപ് എന്നാണു പേരിട്ടത്. അവൻ ബെംഗളൂരുവിൽ ഡീക്ടെക് ആന്റ് എഐ ഫീൽഡിൽ ആണ്.

നിറയെ നിറങ്ങൾ ഉള്ള കുട്ടിക്കാലമാണല്ലേ ?

ഞാൻ കേന്ദ്രീയ വിദ്യാലയത്തിലാണു പഠിച്ചത്. അവിടെ ഉച്ച വരെ മാത്രമേ ക്ലാസുള്ളൂ, ബാക്കി സമയം ഫ്രീയാണ്. അമ്മയ്ക്കും അച്ഛനും വൈകുന്നേരം വരെ ജോലിയുണ്ട്. അന്നു ഞങ്ങൾ കൊച്ചിയിലാണ്. അങ്ങനെയാണ് എന്നെ കലാധരൻ മാഷിന്റെ കേരള കലാപീഠത്തിൽ ചിത്രരചനയ്ക്കു ചേർക്കുന്നത്. അവിടെയാണെങ്കിൽ നിറങ്ങളും രൂപങ്ങളും മാത്രമേയുള്ളു. യഥാർഥത്തിൽ ആ ദിവസങ്ങളാണ് എന്നെ കലയുമായി അടുപ്പിച്ചതെന്നു പറയാം. കലാധരൻ മാഷിനെ എന്നും സ്നേഹത്തോടെ മാത്രമേ ഓർക്കാൻ കഴിയു. പിന്നെ, അച്ഛന്റെയും അമ്മയുടെയും തിരക്കുകൾക്കും നന്ദി.

പിന്നെ കലാപഠനം ഉപേക്ഷിച്ചോ?