2026 FASHION ലളിതം, സുന്ദരം, സുസ്ഥിരം

പുതുമയുടെ കരുത്തും അതിവേഗം സ്റ്റൈലും; 2026ൽ ഫാഷൻ മാറുന്ന ലോകം കീഴടക്കാൻ ഒരുങ്ങിക്കോളൂ!

- ഡെൽന

നിറങ്ങളുടെ വിപ്ലവവും ഡിസൈനുകളിലെ പുതുമയും ഇഴചേരുന്ന 2026ലേക്കു ഫാഷൻ ലോകം ചുവടുവയ്ക്കുന്നു.

സങ്കല്പങ്ങൾക്കപ്പുറം സ്റ്റൈലിനെ പുനർനിർവചിക്കുന്ന ഈ കാലത്ത്, ആത്മവിശ്വാസവും ആധുനികതയും നിറയുന്ന പുത്തൻ ട്രെൻഡുകൾ റാംപുകളിൽ തരംഗമാകാൻ ഒരുങ്ങിക്കഴിഞ്ഞു. ഈ വർഷത്തെ ഏറ്റവും ഗ്ലാമറസ് ആയ മാറ്റങ്ങൾ ഇതാ നിങ്ങൾക്കായി...

ഫാഷൻ ഫോർ കാസ്റ്റ്

വിപണിയിലെ ആവശ്യങ്ങളും വിൽപനയും വിലയിരുത്തിയും കൾച്ചറൽ ഷിഫ്റ്റുകളും മാറുന്ന മനോഭാവങ്ങളും സിനിമ പോലുള്ള സ്വാധീനങ്ങളും മനസ്സിലാക്കിയും സമീപ ഭാവിയിലെ ട്രെൻഡുകൾ പ്രവചിക്കുന്നതാണ് ഫാഷൻ ഫോർ കാസ്റ്റ്.

കസ്റ്റമർ ഡിമാൻഡിനനുസരിച്ച് വസ്ത്രങ്ങൾ എത്തിക്കാൻ ഇതു ബ്രാൻഡുകളെ സഹായിക്കും. ഡിമാൻഡ് എത്തിക്കഴിഞ്ഞു തുണിയെടുക്കാനും വലിയ നമ്പറുകളിൽ തയ്ച്ചെടുത്തു വിപണിയിലെത്തിക്കാനും കഴിയില്ലല്ലോ... ഒരുക്കങ്ങൾ നേരത്തേ തുടങ്ങിയാലേ തക്കസമയ സ്റ്റോറുകൾ ആവശ്യത്തിനു സ്റ്റോക്കുമായി സജ്ജമാകൂ. വിപണിയിലെത്തുന്ന ട്രെൻഡുകൾ അറിഞ്ഞിരിക്കുന്നതു വാങ്ങുന്നവർക്കും ഉപകാരമാണ്.

മുൻകാലങ്ങളിൽ നമ്മുടെ നാട്ടിൽ ഫോർ കാസ്റ്റ് റിപ്പോർട്ടുകൾ അത്രയധികം പരിഗണിക്കപ്പെട്ടിരുന്നില്ല. എന്നാൽ ഇപ്പോൾ മാളുകളിലും ബ്രാൻഡഡ് സ്റ്റോറുകളി ലും സ്ഥിതിയതല്ല. ട്രെൻഡിയാകേണ്ടിടത്ത് ഏറ്റവും മുന്നിൽ നിൽക്കാനും യുണീക്ക് ഡിസൈനുകൾ വേണ്ടിടത്ത് അതു തിരഞ്ഞെടുക്കാനും മലയാളികൾ ശ്രദ്ധിക്കുന്നുണ്ട്.

2026 ട്രെൻഡ് ഫോർ കാസ്റ്റ്

നിറങ്ങളിൽ വിരിയുന്ന ട്രാൻസ്ഫമേറ്റീവ് ടീൽ

2026 ന്റെ ഔദ്യോഗിക നിറമായി ഫാഷൻ വിദഗ്ധർ പ്രവചിക്കുന്നതു നീലയും പച്ചയും കലർന്ന ട്രാൻസമേറ്റീവ് ടീൽ ആണ്. ശാന്തതയും ആത്മവിശ്വാസവും പകരുന്ന ഈ നിറം സാരികളിലും ലെഹംഗകളിലും പുരുഷന്മാരുടെ കുർത്തകളിലും ഒരുപോലെ തിളങ്ങും.