Slangtyd is weer hier!

Die groen boomblare is 'n bewys van die nuwe seisoen wat aangebreek het namate die koue weer terugtrek en plek maak vir die warm son.

- Chantelle Hartebeest

So ontwaak verskeie diertjies ook uit hul winterslaap om weer in die lenteson te bak.

Paarl Post, 'n susterskoerant van Standard Breederiver Gazette, het met die bekende plaaslike slangvanger Eduanne Niemand gesels om te hoor of die slangseisoen reeds aangebreek het.

"Ek het verlede week net pofadders gevang, maar hierdie week is dit maar stil. Die afgelope naweek was ook stil, maar ek het een oproep oor 'n kobra gehad. Die mense het hom egter nie dopgehou nie en hy het weggekom. Twee weke gelede was dit rowwer. Nou is die koue weer terug, maar ja, die slangseisoen is aan die go."

Volgens Niemand kom hy deesdae meer op pofadders af. Hy meen op warm dae kom die pofadders uit om hul "batterye te recharge".