Swartland-'Skryfyster' maak golwe

Die Skryfyster van die Swartland, wie se skryfwerk die afgelope dekade oor verskeie bedrywe strek, maak golwe met die vrystelling van haar eerste bundel kortverhale.

- 

Anna-Bet Stemmet (40) van Malmesbury het onlangs die groot sprong van die skryf van haar eie, enkele kortverhaal tot 'n hele bundel vol daarvan geneem.

Dié ma van twee is 'n vryskut-kopieskrywer. Hierdie brood-en-botter-skryfwerk, soos sy dit noem, strek van kos en wyn tot landbou, tegnologie, mode en kleinhandel. "Ek het woorde gevind vir alles van beesvoer tot cloud architecture. Dit klink dalk droog, maar hierdie soort werk hou die pot aan die kook en kry 'n mens skryf-fiks like nobody's business," voeg sy in 'n onlangse verklaring by. Sy het onder meer ook JAN se kookboek vertaal, en die Afrikaanse bewoording van die drietalige kinderboek Florence and Watson behartig, waar sy haar kreatiewe sy kon koester.

As die oudste dogter van 'n koöperatiewe wynmaker het Anna-Bet met 'n wye draai deur die wynlande tot in die hartjie van die streek gedartel.

Sy is as nooi Bester in Robertson gebore en toe sy vyf jaar oud was, het die gesin Worcester toe getrek, waar haar pa 'n pos as wynmaker in De Doorns aanvaar het. Sy was in Worcester Noord Primêre Skool en later die Hoërskool Montana. Hulle het in 2000 na Riebeek-Kasteel verhuis en sy na Paarl Gimnasium geskuif, waar sy as A-kandidaat matrikuleer het.

SKRYF VIR SKOOLKOERANT 'SOLLIE'

Gedurende haar tyd op die skoolbanke het sy aan allerlei kultuurgeleenthede soos Akpol en redenaars deelgeneem en ook vir die Sollie, die skoolkoerant, geskryf.

Sy beskryf haar pad ná skool as 'n interessante een.