Akademia open deure in die Paarl

Akademia het die afgelope Woensdag (15 Oktober) 'n nuwe hoofstuk in die Afrikaanse hoër onderwys geskryf met die amptelike opening van sy splinternuwe kampus in die Paarl. Dié onafhanklike Afrikaanse hoëronderwysinstelling, wat reeds in Pretoria gevestig is, het daarmee sy voetspoor na die Wes-Kaap uitgebrei.

- Jana Scheepers

Een van die Akademia Paarl-kampus se lesingslokale. Die kampus se koffiewinkel, genaamd Sowel-As.

Die kampus in Bredastraat 1 is op 'n spoggeleentheid aan die gemeenskap en voornemende studente bekendgestel. Voltydse studente sal hul studies hier in 2026 kan begin, terwyl na-uurse studente ook die kampus sal kan gebruik.

Akademia het sy deure oorspronklik in 2011 geopen.

Volgens Marthinus Visser, die besturende direkteur van Akademia, verteenwoordig die opening die verdieping van 'n vertrouensverhouding tussen die instelling en die Afrikaanse taalen kultuurgemeenskappe in die Wes-Kaap.

"Sakeondernemings, alumni en ondersteuners het hande gevat met geloof in ons visie. Hierdie kampus behoort nie net aan Akademia nie - dit behoort aan elkeen wat in die waarde van moedertaalonderrig glo," sê hy.

Gawie du Toit, die Paarl-kampushoof, het beklemtoon dat die Afrikaanse taalbeweging sy oorsprong in die Paarl het.