Saron-groep eis antwoorde by trust

Die SaronBekommerde Inwonersforum (SBI) beskuldig 'n plaaslike trust daarvan dat hy op onregmatige wyse van drie trustees ontslae geraak het en dat die trust weier om finansiële verslae oor gemeenskapsprojekte bekend te maak.

- Rasaad Adams

Die Gouda/Saron Wind Farm-trust is in 2011 gestig toe drie maatskappye beplan het om grond langs die R44 tussen Saron en Gouda vir die doeleindes van die windplaas, wat in 2015 geopen is, te ontwikkel.

Die idee was dat inwoners van beide gemeenskappe begunstigdes van die trust sou wees en dat die windplaas se opbrengs in die vorm van dividende met dié twee dorpe deur die trustrekening gedeel moes word.

Hierdie dividende moes dan vir gemeenskapsprojekte aangewend word. Ingevolge die trust se grondwet moet die raad van trustees uit verteenwoordigers van al twee dorpe bestaan.

Nadia Williams van die SBI het egter vandeesweek beweer die drie inwoners wat Saron op die raad verteenwoordig het, is in 2020 op 'n vergadering - wat deur die destydse raadslid beroep is – onregmatig verwyder.

Hulle is toe met drie nuwe verteenwoordigers vervang, wat nog finaal deur die meester van die hof afgeteken moet word.