உயர வேண்டும் உயர்கல்வி

தமிழ்நாடு அரசு அறிவியல், கலைக்கல்லூரிகளில் இரண்டு கட்டங்களாக சுமார் 1,462 கௌரவ விரிவுரையாளர்கள் கடந்த சில மாதங்களில் நியமனம் செய்யப்பட்டுள்ளனர்.

- மு. சிபிகுமரன்

2,708 நிரந்தர உதவிப் பேராசிரியர்களை நியமிக்க தேர்வுக்கான செயல்முறைகள் நடைபெறுகின்றன. தமிழ்நாடு அரசு புதிய கல்லூரிகளையும் தொடங்கி உயர் கல்வியை அனைவரும் எட்டுகிற வாய்ப்பை உருவாக்கி வருகிறது. மாணவர்களின் கல்வி நலன் கருதி தமிழக அரசு வழங்கும் பல்வேறு வகையான உதவித்தொகைகள் அவர்களுக்கு ஊக்கம் தருவதோடு பெற்றோரின் பொருளாதாரச் சுமையை ஓரளவுக்குக் குறைத்துள்ளது என்றும் கூறலாம்.அண்மையில் மேற்கு ஆஸ்திரேலியா, மத்திய மெக்ஸிகோ நாடுகளைச் சேர்ந்த அரசுத் துறை கல்வியாளர்கள் மற்றும் தொழில்நுட்ப வல்லுநர்கள் தமிழ்நாட்டுக்கு வந்து உயர் கல்வித் துறையோடு பாடத் திட்ட பகிர்வுகளுக்கான பேச்சுவார்த்தைகளை மேற்கொண்டனர். இவை தவிர்த்து நவீன வகுப்பறைகள், பசுமைக் கல்லூரிகள், உளவியல் ஆலோசனைகள், போட்டித் தேர்வுக்கான வழிகாட்டுதல் என புதிய முயற்சிகளையும் நாம் கல்லூரிகளில் பார்க்க முடிகிறது. தமிழ்நாடு உயர் கல்வித் துறை சரியான திசையில் பயணிக்கிறது என்பதை எடுத்துக்காட்டும் நிகழ்வுகள் இவை எனலாம்.

ஆனாலும், நாளுக்கு நாள் அதிகரித்து வருகிற வேலைவாய்ப்பின்மையை உரிய முன்னெச்சரிக்கையோடு அணுகி பாடத் திட்டங்களை மாற்றியமைத்து உயர் கல்வி வளாகங்களை தேசிய மற்றும் உலகளாவிய வேலைவாய்ப்புக்கான களங்களாக மாற்ற வேண்டும்.

இந்தியாவின் மக்கள்தொகை நாளுக்கு நாள் பெரிதும் அதிகரித்து வருகிறது. இந்த நிலையில், அரசுத் துறைகளில் அனைவருக்குமான வேலைவாய்ப்பு சாத்தியமில்லாத ஒன்றாகும். ஆகவே, தமிழ்நாட்டில் உயர் கல்வியை நோக்கிப் பயணிக்கின்ற இன்றைய தலைமுறையை சரியான முறையில் வழிகாட்டி அழைத்துச்செல்ல வேண்டியது அவசியமாகிறது. தமிழகத்தில் மற்ற அரசுத் துறை வேலைவாய்ப்புகளோடு, மத்திய அரசின் வேலைவாய்ப்பையும் பெறுகிற உத்திகளை வகுத்து இந்திய குடிமைப் பணிகள், எஸ்எஸ்சி நடத்தும் சார்புப் பணிகள், ரயில்வே, வங்கிப் பணிகள் மற்றும் ஏனைய மத்திய அரசின் பணியிடங்களுக்கான தேர்வில் குறைந்தபட்சம் 10% சதவீத பணியிடங்களை ஆண்டுதோறும் தமிழ்நாட்டு மாணவர்கள் பெறும் வகையில் ஊக்கமும் நம்பிக்கையும் பயிற்சியும் அவர்களுக்கு வழங்கப்பட வேண்டும்.