உலகை நிலைக்கச் செய்யும் ஆயுதம் !

பல்லுயிர் பெருக்கத்தின் அவசியம் மற்றும் அது தொடர்பான விழிப்புணர்வை ஏற்படுத்தும் வகையில், ஐ.நா. சபையால் அறிவிக்கப்பட்டு ஆண்டு தோறும் கடைப்பிடிக்கப்படும் உலக பல்லுயிர் பெருக்க தினம் அண்மையில் (மே 22) கடைப்பிடிக்கப்பட்டது.

- இரா. ஜெயசீலன்

உலக அளவில் சுமார் 87 லட்சம் உயிரினங்கள் தற்போது புவியில் இருப்பதாக அறிவியல் ஆய்வாளர்களின் ஆய்வுகள் மற்றும் கணக்கீட்டின்படி தெரியவந்துள்ளது. இவற்றில் விலங்கினங்கள் மட்டும் 77 லட்சமாக உள்ளது; தாவரங்கள், சிறு உயிரினங்கள், பூஞ்சை போன்ற நுண்ணுயிரிகள் என அனைத்தும் இவற்றில் உள்ளடங்கியுள்ளன.

பல்லுயிர்கள் என்பது புவியின் சுற்றுச் சூழல், இயற்கை வளம், புவியின் சமநிலை, புவி சுகாதாரம் என புவியின் அனைத்துப் பணிகளையும் செய்வதில் ஒன்றுக் கொன்று மிகுந்த தொடர்புடையதாக உள்ளன. பல்லுயிர் பெருக்கத்தின் காரணமாகவே இன்று அனைத்து உயிரினங்களும் தங்கள் பாரம்பரியத் தன்மை மாறாமல் பூமியில் நிலைபெற்றிருக்கும் சூழல் உள்ளது.

உணவுச்சங்கிலி, உணவு வலை போன்ற அனைத்துக் காரணிகளும் பல்லுயிர் சார்ந்த நிகழ்வாகவே உள்ளது. இது பூமியில் உயிரினங்களின் சமநிலை மற்றும் வாழ்வின் தொடர்ச்சியை நீடிக்கும் காரணியாக உள்ளது.