ടെറസിലും ടർഫ്

ടെറസിലോ വീട്ടുമുറ്റത്തെ ഇത്തിരി ഇടത്തിലോ എവിടെയുമാകാം ടർഫ്. സെലിബ്രിറ്റികൾക്ക് മാത്രമല്ല സാധാരണക്കാർക്കും പ്രാപ്യം.

- 

വൈകിട്ട് ജോലി കഴിഞ്ഞുവന്ന് കുടുംബത്തിനൊപ്പം അല്പനേരം ഫുട്ബോൾ കളിക്കാൻ ഇഷ്ടമാണോ? മുറ്റത്തോ ടെറസിലോ അല്പം സ്ഥലമുണ്ടെങ്കിൽ മറ്റെങ്ങും ടർഫ് അന്വേഷിച്ചു പോകേണ്ടിവരില്ല. കുറഞ്ഞ സ്ഥലത്തും ടർഫ് സ്ഥാപിച്ചു തരാൻ തയാറാണ് പാലാ സ്വദേശി സി. ടി. വിനീതിന്റെ എയ്സ് സ്പോർട്സ് യൂണിറ്റ് എന്ന സിന്തറ്റിക് സ്പോർട്സ് ടർഫ് നിർമാണക്കമ്പനി.

“ കുട്ടികളുടെ മൊബൈൽ അഡിക്ഷനെക്കുറിച്ച് ആശങ്കപ്പെടുന്നതല്ലാതെ, അഡിക്ഷൻ കുറയ്ക്കാൻ എന്തു ചെയ്യാംഎന്ന് ചിന്തിക്കുന്നവരാണ് വീട്ടിൽത്തന്നെ കളിസ്ഥലങ്ങൾ നിർ മിക്കുന്നതിനെ ഏറ്റവുമധികം പ്രോത്സാഹിപ്പിക്കുന്നത്. സ്പോർട്സ്, സിനിമ, ബിസിനസ് രംഗത്തെ പ്രശസ്തരെല്ലാം വീട്ടിൽത്തന്നെ ടർഫ് സ്ഥാപിക്കുന്നുണ്ട്, ''പുതിയ ട്രെൻഡിനെക്കുറിച്ച് വിനീത് പറയുന്നു.

ബാഡ്മിന്റൺ, ബാസ്ക്കറ്റ്ബോൾ, ഫുട്ബോൾ, ക്രിക്കറ്റ് തുടങ്ങി എവിടെയും ഇൻഡോർ ഔട്ട്ഡോർ കളികൾക്കുള്ള ടർഫ് തയാറാക്കാൻ സാധിക്കും. വീടിനോടു ചേർന്നുള്ള ചെറിയ ഏരിയയോ, തുറന്ന ടെറസോ, ട്രസ്സ് ചെയ്ത ടെറസിനുള്ളിലെ സ്ഥലമോ ഉണ്ടെങ്കിൽ അതുമതി ഒന്നാന്തരമൊരു കളിസ്ഥലമൊരുക്കാൻ. അഞ്ച് മീറ്റർ നീളമുള്ള സ്ഥലമുണ്ടെങ്കിൽത്തന്നെ ഫ്രീ ത്രോ ഏരിയ ഒരുക്കാമെന്നാണ് വിനീത് പറയുന്നത്.