കഥ പറയുന്ന കാർപെറ്റുകൾ

ചേർത്തലയെന്ന കൊച്ചു പട്ടണത്തിൽ നിന്ന് ആഗോള ബ്രാൻഡ് ആയി വളർന്ന "നെയ്ത്ത് കാർപെറ്റിന്റെ കഥകൾ

- സോന തമ്പി

ഒരു കാർപെറ്റിന് ലോകശ്രദ്ധ ആകർഷിക്കാനാവുമോ? തീർച്ചയായും' എന്ന് ലോകത്തോട് വിളിച്ചുപറയുന്നത് ചേർതലയിലെ നെയ്ത്ത്' ബ്രാൻഡ് ആണ്.

ന്യൂയോർക്കിൽ നടന്ന 2023 മെറ്റ് ഗാലയിലെ പടവുകളിൽ വിരിച്ച വെള്ളയിൽ പിങ്ക് വരകളുള്ള കാർപെറ്റ് വൈറൽ ആയി മാറിയിരുന്നു. കാർപെറ്റിലൂടെ റാംപ് വാക്ക് ചെയ്ത അതിപ്രശസ്തരോടും അവരുടെ ഫാഷൻ ഉടയാടകൾക്കുമൊപ്പം ആലപ്പുഴയിൽ നിന്നുള്ള നെയ്ത്ത്' എന്ന ബ്രാൻഡും ആഗോളതലത്തിൽ തങ്ങളുടെ സ്ഥാനം ഉറപ്പിച്ചു. കുടുംബ കമ്പനിയിലെ വൈവിധ്യവൽക്കരണം എന്നും സ്വപ്നം കണ്ടിരുന്ന യുവതലമുറക്കാരൻ ശിവൻ സന്തോഷും ഭാര്യ നിമിഷയും ആ കഥ വനിത വീടിനോടു പങ്കുവയ്ക്കുന്നു.

കാർപെറ്റിന്റെ കഥയിലേക്ക്...

106 വർഷം പാരമ്പര്യമുള്ള കയർ വ്യവസായമാണ് ഞങ്ങളുടേത്. 2000ലെ ഭാഗം വയ്ക്കലിനു ശേഷം അച്ഛൻ സന്തോഷ് വേലായുധൻ “എക്സ്ട്രാവീവ്' എന്ന കമ്പനി തുടങ്ങി. കാർ പെറ്റുകൾ പൂർണമായും കയറ്റുമതി ചെയ്യുന്ന കമ്പനിയാണ് ഞങ്ങളുടേത്. കഴിഞ്ഞ വർഷങ്ങളിൽ എടുത്തുപറയത്തക്ക കുറേ നേട്ടങ്ങൾ ഉണ്ടാക്കാൻ കമ്പനിക്ക് കഴിഞ്ഞിരുന്നു. 2012 ൽ യുഎസിലെ വൈറ്റ് ഹൗസിൽ വച്ചു നടന്ന ഹെഡ്സ് ഓഫ് സ്റ്റേറ്റ്സിനു വേണ്ടിയുള്ള ഗാനനിശയിൽ ഹാളിനകത്ത് വിരിച്ചത് എക്സ്ട്രാവീവിന്റെ കാർപെറ്റ് ആയിരുന്നു. അതിന് ഏകദേശം 2 x 25 മീറ്റർ വലുപ്പം കാണും.

കംപ്യൂട്ടർ എൻജിനീയറിങ്ങിൽ ബിരുദമെടുത്തശേഷം ചെന്നൈയിലും മറ്റും ജോലി ചെയ്തു. പിന്നീട് സ്വന്തം കമ്പനിയിലും ഒരു കൈ നോക്കി. അച്ഛന് വളരെ നിർബന്ധമുണ്ടായിരുന്നു എല്ലാ ഡിപാർട്മെന്റിലും ജോലി ചെയ്യണമെന്ന്. അങ്ങനെ കമ്പനിയിലെ എല്ലാ കാര്യങ്ങളും പഠിക്കാൻ എനിക്കായി.

പിന്നീട് ബിസിനസ്സ് പഠിക്കാൻ യുഎസിലേക്ക് പോയി. വിവാഹം കഴിഞ്ഞ് നിമിഷയുമൊത്താണ് അവിടെ പോയത്. അവിടെ ചെന്നാണ് സംരംഭകത്വം എന്ന രീതിയിൽ ചില കാര്യങ്ങൾ ചെയ്യണമെന്ന മോഹം ശക്തമായത്. ആർട്ടിൽ വളരെ താൽപര്യമുള്ളയാളാണ് നിമിഷ.