നിശബ്ദനാം സഹയാത്രികൻ

കരുതലാവശ്യമുള്ള ഒരുപാടു കുട്ടികൾ ഇവിടെ നിന്ന് ചിത്രശലഭങ്ങളെപ്പോലെ ചിറകു വിരിച്ചു പറന്നു

- ARCHITECT Dr. Benny Kuriakose

നമ്മുടെ സഹയാത്രികരാണ് കെട്ടിടങ്ങൾ. ഒന്നും ഉരിയാടുന്നില്ലെങ്കിലും ഒരടിപോലും നീങ്ങുന്നില്ലെങ്കിലും യാത്രയുടെ ഗതി നിർണയിക്കാൻ അവയ്ക്കാകും. എനിക്ക് ഈ പാഠം പകർന്നു തന്നത് ഒരു പാഠശാലയാണ്; ഭിന്നശേഷിക്കാരായ കുട്ടികൾക്കു വേണ്ടി രൂപകൽപന ചെയ്ത ഒരു പാഠശാല, ചെന്നൈ കൊളപ്പഞ്ചേരിയിലുള്ള സങ്കൽപ് ലേണിങ് സെന്റർ,

 ഈ പ്രോജക്ട് ഏറ്റെടുക്കുമ്പോൾ സങ്കീർണമായ ജീവിതാനുഭവങ്ങളുടെ തുടക്കമാണിതെന്ന ഒരു സൂചന പോലുമുണ്ടായിരുന്നില്ല. സങ്കൽപ് ട്രസ്റ്റിന്റെ ചുമതലക്കാരായ സുലത യും ഡോ. അജിത്തുമായുള്ള ആ കൂടിക്കാഴ്ച ഇപ്പോഴും മനസ്സിലുണ്ട്. ഓട്ടിസം സ്പെക്ട്രം ഡിസോർഡർ (എഎസ്ഡി) നേരിടുന്ന കുട്ടികൾക്കായി ഒരു സ്കൂൾ രൂപകൽപന ചെയ്യണം എന്ന ആവശ്യവുമായാണ് അവരെത്തിയത്. പത്ത്പതിനഞ്ച് വർഷമായി വാടകക്കെട്ടിടത്തിലാണ് സങ്കൽപ് സ്കൂൾ പ്രവർത്തിച്ചിരുന്നത്.