അങ്ങനെ പത്തുപേർ

കഥക്കൂട്ട്

- തോമസ് ജേക്കബ്

വിവാഹത്തിനു പത്തുപേർ മതി എന്നു ശ്രീനാരായണഗുരു പറഞ്ഞത് ചിലർ മാത്രമേ നടപ്പാക്കിയുള്ളു.

ഒരു കാറിൽ കൊള്ളാവുന്നവർ മാത്രം പങ്കെടുത്ത വിവാഹമായിരുന്നു പത്രാധിപർ ഐ.വി.ദാസിന്റെയും വി.കെ. സുശീലയുടെയും, വധൂവരന്മാർക്കു പുറമേ നാല പേർ മാത്രം. കല്യാണപ്പെണ്ണിനൊപ്പം ഉണ്ടായിരുന്ന ഏക സ്ത്രീ അവളുടെ അമ്മയായിരുന്നു.

പവനനും പാർവതിയും തമ്മിലുള്ള വിവാഹത്തിനു പവനന്റെ പാർട്ടിയിൽ അഞ്ചു പേരാണുണ്ടായിരുന്നത്. വരനു പുറമേ എസ്.കെ. പൊറ്റെക്കാട്ട്, തിക്കോടിയൻ, കെ. പി.രാമൻ നായർ, പി.ചന്ദ്രശേഖരൻ.

നടി സുകുമാരിയും ചലച്ചിത്ര സംവിധായകൻ ഭീംസിങ്ങും തമ്മിലുള്ള വിവാഹത്തിൽ പങ്കെടുത്തത് നാലു പേർ മാത്രമാണെങ്കിലും എല്ലാവരും വമ്പന്മാരായിരുന്നു. ശിവാജിഗണേശൻ, ചന്ദ്രബാബു, ഭീംസിങ് സംവിധാനം ചെയ്തു അപ്പോൾ തിയറ്ററുകളിൽ ജനങ്ങൾ ഇടിച്ചു കയറി കൊണ്ടിരുന്ന ഭാഗപ്പെരുവണ ചിത്രത്തിന്റെ നിർമാതാവ് ജി.എൻ.വേലുമണി, മറ്റൊരു പ്രമുഖ നിർമാതാവായ എ.എൽ. ശ്രീനിവാസൻ.

ശിവഗിരിയിൽ ഏറ്റവും ലളിതമായ വിവാഹമേ പാടുള്ളൂവെന്ന് തിരുനല്ലൂർ കരുണാകരൻ നിർബന്ധം പിടിച്ചതു കൊണ്ട് അദ്ദേഹത്തിന്റെയും ബേബിയുടെയും വിവാഹത്തിന് എട്ടു സുഹൃത്തുക്കളെ മാത്രമേ വിളിച്ചിരുന്നുള്ളൂ (1958)