സഭാകമ്പം

കഥക്കൂട്ട്

- തോമസ് ജേക്കബ്

തിരക്കഥയ്ക്കുള്ള രാഷ്ട്രപതിയുടെ അവാർഡ് ലഭിച്ചപ്പോൾ പുരസ്കാരം വാങ്ങാൻ ഡെന്നീസ് ജോസഫ് ഡൽഹിക്കു പോയില്ല. കാരണം: സ്റ്റേജിൽ കയറാനുളള സഭാകമ്പം.

ചെറുപ്പത്തിലെ പ്രശസ്തിയിലേക്കുയർന്ന വയലാർ രാമവർമയെ സാഹിത്യ സമ്മേളനങ്ങളിൽ പ്രസംഗിക്കാൻ വിളിക്കുമ്പോൾ ആദ്യകാലത്ത് സഭാകമ്പം മൂലം അദ്ദേഹം മുങ്ങുമായിരുന്നു.

ഒരിക്കൽ വിരിപ്പുകാലായിൽ സാഹിത്യ സമ്മേളനത്തിൽ വയലാറിനു പകരം വയലാറെന്ന നാട്യത്തിൽ സംഘാടകർ പ്രസംഗിക്കാൻ കൊണ്ടുവന്നത് അമ്മാവൻ കേരളവർമയുടെ മകൻ ശങ്കരക്കുറുപ്പിനെയാണെന്നു ശങ്കരക്കുറുപ്പ് ദേശാഭിമാനിയിൽ എഴുതിയിരുന്നു.

പാടുമ്പോഴുള്ള സഭാകമ്പം ഇപ്പൊഴുമുണ്ടെന്നു ഗായിക കെ.എസ്.ചിത്ര: “ഗാനമേളകളിലും മറ്റും ആദ്യത്തെ പാട്ട് ഞാനിപ്പൊഴും പേടിയോടെയാണു പാടുന്നത്.

കെപിഎസി ഒഴിവില്ലാതെ തുടർച്ചയായി നാടകം കളിക്കുന്നതിനാൽ ചില നടീ നടന്മാർക്കു ചില ദിവസങ്ങളിൽ ശാരീരികാസ്വാസ്ഥ്യങ്ങൾ മൂലം വേദിയിൽ കയറാൻ വയ്യാതെ വരും. അപ്പോൾ പകരക്കാരെ ഏർപ്പാടുചെയ്യുകയാണു പതിവ്. പുരുഷന്മാർക്കു പകരക്കാരായി പിന്നണിയിൽ നിന്ന് ജോൺസൺ, ജോസഫ്, പാപ്പച്ചൻ തുടങ്ങിയവരായിരിക്കും അഭിനയിക്കുക. പിൽക്കാലത്ത് ജോൺസണും ജോസഫും പ്രശസ്ത നടന്മാരായി.