സാഹിത്യക്കേസുകൾ

കഥക്കൂട്ട്

- തോമസ് ജേക്കബ്

എതിർ വിഭാഗത്തിനെതിരെ പുസ്തകമെഴുതി വാശിതീർത്ത സാഹിത്യകാരന്മാരുണ്ട്. അതുകൊണ്ടരിശം തീരാതെ കോടതിയിൽ കേസു കൊടുത്തവരും കുറവല്ല.

ഏറ്റവും കൂടുതൽ പ്രതികരണ ഗ്രന്ഥങ്ങളുണ്ടായത് തോപ്പിൽ ഭാസിയുടെ "നിങ്ങളെന്നെ കമ്യൂണിസ്റ്റാക്കി' നാടകത്തിനാണെന്നു തോന്നുന്നു. ഒളിവിലിരുന്ന് സോമൻ എന്ന കള്ളപ്പേരിൽ എഴുതിയ മുന്നേറ്റം എന്ന ഏകാങ്ക നാടകം പിന്നീട് ഭാസി നിങ്ങളെന്നെ കമ്യൂണിസ്റ്റാക്കി എന്ന പേരിൽ വികസിപ്പിക്കുകയായിരുന്നു.

ഇതിന് സി.ജെ.തോമസ് എഴുതിയ പ്രതിനാടകമാണ് "വിഷവൃക്ഷം.' ഇങ്ങനെയൊരു രാഷ്ട്രീയ കൃതി രചിക്കാൻ സിജെ വേണമെന്നില്ലായിരുന്നു എന്നു വിമർശനമുണ്ടായപ്പോൾ വർഷങ്ങൾക്കുശേഷം അതൊന്നു മാറ്റിയെഴുതാൻ സിജെ തീരുമാനിച്ചു. പക്ഷേ, അതു ചെയ്യാൻ കഴിയും മുൻപ് മരണമെന്ന വിഷവൃക്ഷം ഇടപെട്ടു.

കമ്യൂണിസ്റ്റ് വിരുദ്ധനായ പി. കേശവദേവ് ഭാസിക്ക് ഒരു പ്രതിനാടകവുമായി വന്നു. “ഞാനിപ്പക്കമ്യൂണിസ്റ്റാവും. സിവിക് ചന്ദ്രന്റെ രചന "നിങ്ങൾ ആരെ കമ്യൂണിസ്റ്റാക്കി?' എന്നായിരുന്നു.

വർഷങ്ങൾക്കുശേഷം തോപ്പിൽ ഭാസിയുടെ മകൻ തോപ്പിൽ സോമൻ "നിങ്ങളെന്നെ കമ്യൂണിസ്റ്റാക്കി'ക്കു പ്രതിനാടകം എഴുതി എന്നതാണ് ചരിത്രത്തിലെ കറുത്ത ഫലിതം.