അസ്ലമിന്റെ ഇഷ്ട പതാക

"മോന് ഭൂപടങ്ങൾ മനസ്സിലാക്കാനും രാജ്യങ്ങളുടെ പേരുകൾ പഠിക്കാനും അതിന്റെ സ്ഥാനം കണ്ടുപിടിക്കാനുമൊക്കെ വലിയ താൽപര്യമാണെന്ന് സ്കൂളിലെ ടീച്ചർ പറഞ്ഞിരുന്നു. നല്ല നിരീക്ഷണപാടവം അവന് ഉണ്ടെന്നു മനസ്സിലായതോടെ അത് വളർത്തിയെടുക്കാൻ ശ്രമിച്ചു.

- റംസി ഹുസൈൻ

ഞങ്ങളുടെ മൂന്ന് ആൺമക്കളിൽ മൂത്തവനാണ് അസ്ലം. കല്യാണം കഴിഞ്ഞ് നാലുവർഷങ്ങൾക്കുശേഷമാണ് അവന്റെ ജനനം. രണ്ടു വീട്ടുകാർക്കും വളരെയേറെ സന്തോഷമായിരുന്നു. പക്ഷേ, ആ സന്തോഷത്തിന് ഒന്നര വർഷം മാത്രമേ ആയുസ്സുണ്ടായിരുന്നുള്ളൂ. ഒരു വയസ്സ് ആയിട്ടും അവൻ ഉമ്മ' എന്ന വാക്കുമാത്രം പറഞ്ഞില്ല.

സംസാരം മാത്രമല്ല, നമ്മൾ പറയുന്നത് അവൻ കേൾക്കുന്നുമില്ല. ഒരു ഡോക്ടറെ കാണിക്കണമെന്നു പറയുന്നത് എന്റെ ഉമ്മയാണ്. കേൾവിപരിശോധന നടത്തിയപ്പോൾ ഒരു കുഴപ്പവും ഇല്ല എന്നു മനസ്സിലായി. പിന്നീടാണ് അവിന് ഓട്ടിസമാണെന്നു ഡോക്ടർ പറയുന്നത്. ഡോക്ടർ ഓട്ടിസത്തെക്കുറിച്ച് എന്തൊക്കെയോ പറഞ്ഞു മനസ്സിലാക്കിത്തരാൻ ശ്രമിക്കുന്നുണ്ടായിരുന്നു. ആ സമയങ്ങളിലെല്ലാം ഞാൻ അവനെ ചേർത്തു പിടിച്ചു കരഞ്ഞു. ഇങ്ങനെയുള്ള ചില കുട്ടികൾ നല്ല കഴിവുകൾ ഉള്ളവരായിരിക്കും, അതു കണ്ടെത്താൻ ശ്രമിക്കണം എന്നൊക്കെ പറയുന്നതു കേട്ടപ്പോൾ അതെല്ലാം എന്നെ സമാധാനിപ്പിക്കാൻ വേണ്ടിയായിരിക്കും എന്നു ഞാൻ കരുതി.