സ്നേഹിച്ചു വളർത്താം നിയമക്കുരുക്കിൽ പെടാതെ

സവിശേഷ വളർത്തു ജീവികളെ സ്നേഹിക്കാനും പരിപാലിക്കാനും തുടങ്ങും മുൻപ് അറിഞ്ഞിരിക്കേണ്ട നിയമ വശങ്ങൾ

- ഡെൽന സത്യരത്ന

എന്താടോ ബാഗിനുള്ളിൽ? “അതു പിന്നെ.... വീട്ടിലുള്ളവർക്കു വേണ്ടിയുള്ള സമ്മാനങ്ങളും മറ്റുമാണ്.'' കംസ്റ്റസ് ഓഫിസറുടെ പ്രതീക്ഷിക്കാതെയുള്ള ചോദ്യം ചെയ്യലിൽ നന്ദു വിരണ്ടു പോയിരുന്നു.

“ഒച്ചയുണ്ടാക്കുന്ന കളിപ്പാട്ടം വല്ലതുമാണോ? കീ..കീന്ന് കരച്ചിൽ പോലെ കേൾക്കുന്നുണ്ടല്ലോ'' “അതെ. ഒരു പക്ഷിപ്പാവയാണ്. അതിന്റെ ബാറ്ററി ഊരിമാറ്റാൻ മറന്നു പോയി.'' "ആ ബോക്സ് ഒന്നു തുറന്നു കാണിക്ക്' എന്ന് ഓഫിസർ പറഞ്ഞതോടെ നന്ദുവിന്റെ കണ്ണിൽ ഇരുട്ടുകയറി. ഓസ്ട്രേലിയയിലെ ബന്ധുവീട്ടിൽ നിന്നു കുഞ്ഞു കൊക്കറ്റുവിനെ ആലപ്പുഴയിലെ സ്വന്തം വീട്ടിലെത്തിക്കാൻ ശ്രമിച്ചത് ഇത്ര വലിയ തെറ്റാണോ? എന്നാലും അവിടുത്തെ അങ്കിൾ പറഞ്ഞതു കേട്ടാൽ മതിയായിരുന്നു.

നിയമനടപടികൾ പൂർത്തിയാക്കി അനുവാദമെടുത്തിട്ടു കൊണ്ടു വന്നാൽ മതിയായിരുന്നു. കൊക്കറ്റുവിനെ കയ്യോടെ പിടികൂടിയ കസ്റ്റംസ് ഉദ്യോഗസ്ഥർ നിയമമനുസരിച്ചുള്ള ഫൈൻ ഈടാക്കിയെന്നു പ്രത്യേകം പറയണ്ടല്ലോ. ഇത്തിരിപ്പോന്ന കോക്കറ്റുവിനെ കൊണ്ടുവരാൻ ഇത്രയും നിയമങ്ങളൊക്കെ എന്തിനാണല്ലേ?

എന്താണ് എക്സോട്ടിക് പെറ്റ്?

സവിശേഷ അരുമമൃഗങ്ങൾക്ക് എക്സോട്ടിക് പെറ്റ്' എന്നൊരു തലയെടുപ്പുള്ള ടാഗുണ്ട്. എന്നാൽ, സാധാരണയായി വീട്ടിൽ വളർത്താത്ത എല്ലാ ജീവജാലങ്ങളും എക്സോട്ടിക് പെറ്റ് ലിസ്റ്റിൽ പെടുകയുമില്ല. ഇവയിൽ ചിലതു വംശനാശ ഭീഷണി നേരിടുന്ന സംരക്ഷിത വിഭാഗത്തിൽ പെടുന്നവയുമാകാം.

അവയെ ഒറിജിനൽ ലൊക്കേഷനിൽ നിന്നു മാറ്റുന്നതു കുറ്റകരമാണ്. ഒരു രാജ്യത്തെ ജീവികളെയോ ചെടികളെയോ അതിന്റെ ലൊക്കേഷൻ വിട്ടു മറ്റൊരു സ്ഥലത്തേക്കു കൊണ്ടുപോകാൻ നിയമാനുവാദം ആവശ്യമാണ്.