സ്നേഹിക്കാം നമ്മളെത്തന്നെ

മറ്റുള്ളവർക്കായി ജീവിക്കുന്നതിനിടയിൽ സ്വന്തം ഇഷ്ടങ്ങളും സ്വപ്നങ്ങളും മറന്നുപോയ വ്യക്തിയാണോ നിങ്ങൾ? എങ്കിൽ ഇതു നിർബന്ധമായും വായിക്കണം

- 

ഫെബ്രുവരിക്കു പ്രണയത്തിന്റെ സുഗന്ധമാണ്. ചുവന്ന റോസാപ്പൂക്കൾ, ഹൃദയാകൃതിയിലുള്ള ചോക്ലെറ്റ്സ്, കാ ണുമ്പോൾ തന്നെ ചേർത്തുപിടിക്കാൻ തോന്നുന്ന പാവ കുട്ടികൾ. വെറുതേ ഷോപ്പിങ്ങിനിറങ്ങുമ്പോൾ പോലും ഓരോ കാഴ്ചയിലും വിപണി നമ്മെ ഓർമിപ്പിക്കും. പ്രണയദിനം വരുന്നു. എന്തു സമ്മാനം തിരഞ്ഞെടുക്കണം? കാമുകനോടോ കാമുകിയോടോ തോന്നുന്നതു മാത്രമാണോ പ്രണയം? ബ്രസീലിയൻ സൂപ്പർ മോഡൽ ജീൽ ബണ്ട് ഷൈൻ പറയുന്നതു കേൾക്കൂ. "സ്വയം സ്നേഹിക്കാത്ത ഒരാൾക്കു മറ്റൊരാളെ സ്നേഹിക്കാനോ സന്തോ ഷിപ്പിക്കാനോ കഴിയില്ല. നിങ്ങളുടെ ജീവിതകാലം മുഴുവൻ കൂടെയുണ്ടാകുമെന്ന് ഉറപ്പുള്ള ഒരേയൊരു വ്യക്തി നിങ്ങൾ തന്നെയാണ്. എന്നിട്ടും, പലപ്പോഴും നമ്മൾ കൂടുതൽ അവഗണി ക്കുന്നത് ആ നമ്മളെ തന്നെ അല്ലേ? എന്തുകൊണ്ട്? ഈ വലന്റൈൻ മാസത്തിൽ, പതിവിൽ നിന്ന് അൽപം മാറി നമുക്കു സ്വയം സ്നേഹിക്കാൻ പരിശീലിച്ചാലോ?

സ്വയം സ്നേഹിക്കുക എന്നു പറയുമ്പോൾ പലരുടെയും ഉള്ളിൽ ഉയരുന്ന ആദ്യത്തെ ചോദ്യം. അതു സ്വാർഥത അല്ലേ എന്നാണ്. "എന്റെ കുട്ടികളെക്കാളും ഭർത്താവിനേക്കാളും മുകളിലാണോ ഞാൻ?' എന്ന ചോദ്യം ചില സ്ത്രീകളുടെ ഉള്ളിൽ പണ്ടേ ആരോ കോറിയിട്ടിട്ടുണ്ട്. യഥാർഥത്തിൽ, സ്വയം തിരഞ്ഞെടുക്കുക അല്ലെങ്കിൽ സ്നേഹിക്കുക എന്നാൽ മറ്റുള്ളവരെ സ്നേഹിക്കാതിരിക്കുക എന്നല്ല അർഥം.

വിമാനയാത്രയിൽ അപകടമുന്നറിയിപ്പ് വന്നാൽ ഓക്സിജൻ മാസ്ക് ആദ്യം സ്വയം ധരിക്കണമെന്നും അതിനു ശേഷം മാത്രമേ മറ്റുള്ളവരെ സഹായിക്കാവു എന്നും പറയാറില്ലേ? അതുപോലെയാണു ജീവിതവും. നിങ്ങളുടെ ഉള്ളിൽ ഊർജവും സന്തോഷവും നിറഞ്ഞാൽ മാത്രമേ അതു നിങ്ങളുടെ കുടുംബത്തിനു പകർന്നു നൽകാൻ നിങ്ങൾക്കു കഴിയൂ. വറ്റിവരണ്ട കിണറ്റിൽ നിന്ന് ആർക്കും വെള്ളം കോരാൻ കഴിയില്ല.

കുറ്റബോധം നിഴൽ പോലെ