റാങ്ക് വാങ്ങാൻ വേണം പ്ലാനിങ്

സിബിഎസ്ഇ പത്താം ക്ലാസ് പരീക്ഷയിൽ 600 ൽ 599 മാർക്ക് സ്വന്തമാക്കിയ റിതികയുടെ പഠന വഴികൾ

- അഞ്ജലി അനിൽകുമാർ

കൃത്യസമയത്ത് ഉചിതമായ തീരുമാനമെടുക്കുന്നതിന്റെ പ്രാധാന്യം ഞാൻ അറിഞ്ഞത് ഈ പരീക്ഷാക്കാലത്താണ്. സയൻസ് പരീക്ഷയ്ക്ക് ഉത്തരമെല്ലാം എഴുതി, വായിച്ചു നോക്കിയ ശേഷം പേപ്പർ മടക്കി വച്ചു. സമയം അവസാനിക്കാറായപ്പോൾ വെറുതേയൊന്നു പേപ്പർ മറിച്ചുനോക്കി. അപ്പോഴാണ് അറിയാവുന്ന ഒരുത്തരം തെറ്റായി എഴുതിയതു ശ്രദ്ധയിൽപ്പെട്ടത്.

ആ തെറ്റിൽ എനിക്കു നഷ്ടപ്പെടാൻ പോകുന്നതു രണ്ടു മാർക്കാണ്. ടീച്ചർ പിന്നിൽ നിന്നു മുന്നിലെ വരിയിലെത്തി ഉത്തരക്കടലാസ് വാങ്ങിത്തുടങ്ങുന്നതു വരെയെ എനിക്കു സമയമുള്ളു. പേടിച്ചെങ്കിലും തിരുത്തിയെഴുതാമെന്നു തീരുമാനിച്ചു. ശരിയുത്തരമെഴുതി അടിവരയിട്ടതും ടീച്ചർ 'ടൈം ഔട്ട്' എന്നു പറഞ്ഞതും ഒരുമിച്ചായിരുന്നു.

ഒന്ന് ആലോചിച്ചു നോക്കൂ, അവിടെ പതറിയിരുന്നെങ്കിൽ, അല്ലെങ്കിൽ എല്ലാം അവസാനിച്ചു എന്നു കരുതിയിരുന്നു കരഞ്ഞിരുന്നെങ്കിൽ 599 എന്ന സ്കോർ എനിക്കു നഷ്ടമായേനെ...'' വിജയത്തിളക്കത്തിനൊപ്പം റിതികയുടെ വാക്കുകളിൽ ആശ്വാസത്തിന്റെയും പ്രതിഫലനമുണ്ട്.

സിബിഎസ്ഇ പത്താം ക്ലാസ് പരീക്ഷാ ഫലം പ്രഖ്യാപിച്ചപ്പോൾ തിരുവനന്തപുരം കവടിയാർ ക്രൈസ്റ്റ് നഗർ സെൻട്രൽ സ്കൂളിലെ വിദ്യാർഥി റിതിക എസ്. എ. എന്ന മിടുക്കി കയ്യെത്തിപ്പിടിച്ചത് 600ൽ 599 മാർക്ക് എന്ന മാന്ത്രിക നേട്ടമാണ്.

മലയാളം, സയൻസ്, കണക്ക്, സോഷ്യൽ സയൻസ്, ആർടിഫിഷൽ ഇന്റലിജൻസ് എന്നീ വിഷയങ്ങൾക്കു നൂറിൽ നൂറ് മാർക്ക് നേടിയപ്പോൾ ഇംഗ്ലിഷിന് 99 മാർക്ക് കിട്ടി.

198 ശതമാനം പ്രതീക്ഷിച്ചിരുന്നെങ്കിലും 99.8 ശതമാനം സ്വപ്നത്തിൽ പോലുമുണ്ടായിരുന്നില്ല. എന്നേക്കാൾ സന്തോഷമിപ്പോൾ അച്ഛൻ ഡോ. കെ. ആർ. ശ്രീജിത്തിനും അമ്മ ഡോ.അശ്വതി ആർ. എസിനും അധ്യാപകർക്കുമാണ്. കൃത്യമായ റിവിഷനും ടൈം മാനേജ്മെന്റ് പരിശീലനവുമാണ് ഈ നേട്ടത്തിലേക്കെത്താൻ സഹായിച്ചത്.'' തിരുവനന്തപുരം ഈഞ്ചക്കലിലെ വീട്ടിലിരുന്നു റിതിക പറയുന്നു.

ഈ നേട്ടം സ്വന്തമാക്കാൻ റിതിക എന്തു ടെക്നിക് ആണ് ഉപയോഗിച്ചതെന്ന് അറിയേണ്ടേ?