അന്ന് ചുമടെടുത്ത ചെയർമാൻ ഇന്ന് ഹിറ്റ് നിർമാതാവ്

ചുമടെടുക്കുന്ന കോളജ് ചെയർമാന്റെ കഥ 1999 ജനുവരി ലക്കം വനിതയിൽ വന്നു. പിന്നീടു വർഷങ്ങൾക്കൊപ്പം വളർന്ന് ഹിറ്റ് ആയി മാറിയ പി. ബി. അനീഷിന്റെ ജീവിതം

- അജിത് ഏബ്രഹാം

സൂപ്പർ ഹിറ്റ് സിനിമാക്കഥയുടെ എല്ലാ ചേരുവകളുമുണ്ട് അനീഷിന്റെ ഒറിജിനൽ ജീവിത തിരക്കഥയ്ക്ക് പറഞ്ഞു വരുന്നത് 27 വർഷം മുൻപ്, കൃത്യമായി പറഞ്ഞാൽ, 1999 ജനുവരിയിലെ വനിതയിൽ പ്രസിദ്ധീകരിച്ച "എന്താ ചെയർമാന് ചുമടെടുത്തൂടേ...' സ്റ്റോറിയിലെ പി.ബി. അനീഷ് എന്ന എറണാകുളം മഹാരാജാസ് കോളജിലെ അന്നത്തെ ചെയർമാനെക്കുറിച്ചാണ്.

ചുമടെടുത്തു നടന്ന കാലത്തെ ദാരിദ്ര്യത്തിന്റെ കഷ്ടപ്പാടുകൾ, പഠനത്തോടൊപ്പം ചെയർമാൻ പദവിയുടെ ഉത്തരവാദിത്തം, സമരങ്ങളുടെ ഭാഗമായി നേരിട്ട് കൊടിയ പൊലീസ്മർദനം, പ്രണയം, ചെറിയ തോതിൽ തുടങ്ങിയ ഇവന്റ് മാനേജ്മെന്റ് സംരംഭം ബ്രാൻഡായി മാറിയത്, പിന്നെ, ചലച്ചിത്ര ലോകത്ത് എത്തി നിൽക്കുന്ന വിസ്മയിപ്പിക്കുന്ന വിജയം.

മോട്ടിവേഷൻ ക്ലാസുകളിൽ കേട്ടിട്ടുള്ള വിജയ അപാരതയുടെ നേർക്കാഴ്ചയാണു പൊരുതി, പടിപടിയായി നേടിയ അനീഷിന്റെ ബോക്സ് ഓഫിസ് ജീവിതവിജയം. ആദ്യം റിലീസായ " ജോ ആൻഡ് ജോ' മുതൽ 'വാഴ' വരെയുള്ള ആറു സിനിമകളുടെ നിർമാതാക്കളിലൊരാളാണ്. കഥ ഫ്ലാഷ്ബാക്കിൽ നിന്നു തുടങ്ങാം.

സീൻ 1 പ്രണയമെത്തിയ നേരം

വർഷം: 1998, എറണാകുളം മഹാരാജാസ് മഹാരാജാസ് കോളജിലെ ഉച്ചഭാഷിണിയിലൂടെ അനൗൺസ്മെന്റ്. ചെയർമാൻ സ്ഥാനാർഥി പി. ബി. അനീഷ് 1,406 വോട്ടിന്റെ ഭൂരിപക്ഷത്തിൽ വിജയിച്ചിരിക്കുന്നു. ചെയർമാനെ തോളിലേറ്റി എറണാകുളം നഗരത്തിലൂടെ കൊട്ടും കുരവയുമായി വിജയഘോഷയാത്ര. കളമശ്ശേരി ഏലൂർ ഗവ. ഹൈസ്കൂളിൽ പത്താം ക്ലാസ്സിൽ പഠിക്കുമ്പോഴേ മഞ്ഞുമ്മൽ പൊയ്യാക്കുളത്ത് ഭരതന്റെ മകൻ അനീഷ് സ്വന്തമായി വരുമാനം കണ്ടെത്തിയിരുന്നു. പുലർച്ചെ പത്രവിതരണത്തിനു പോകുമായിരുന്നു. അങ്ങനെ ഫീസിനുള്ള പണം ഉറപ്പാക്കും.

ബാസ്കറ്റ്ബോൾ സംസ്ഥാന ടീമംഗമായ അനീഷിന് സ്പോർട്സ് ക്വാട്ടയിൽ മഹാരാജാസ് കോളജിൽ പ്രീഡിഗ്രിക്കു പ്രവേശനം കിട്ടി. തുടർന്ന് 1996-ൽ മഹാരാജാസിൽ ഇസ്ലാമിക് ഹിസ്റ്ററി കോഴ്സിനു ചേർന്നു. മഹാരാജാസിന്റെ ചെയർമാനായി. പക്ഷേ, ജീവിതം മുന്നോട്ടു കൊണ്ടുപോകാൻ പഠനത്തിനൊപ്പം ജോലിയും വേണം. അങ്ങനെ എറണാകുളം എരൂർ ഫാക്ട് അമോണിയ പ്ലാന്റിൽ അനീഷ് ചുമട്ടുജോലിക്കു പോയി.