Appa's princess

പ്രിയപ്പെട്ട അപ്പ, കുടുംബം, ഫാഷൻ, സൈബർ അറ്റാക്ക്, രാഷ്ട്രീയം, സ്ഥാനാർഥിത്വം... മനസ്സു തുറന്ന് ആദ്യമായി അച്ചു ഉമ്മൻ

- വിജീഷ് ഗോപിനാഥ്

ചീപ്പു തൊടാത്ത മുടിയുണ്ടായിരുന്ന, ഇസ്തിരിയിടാത്ത കുപ്പായമിട്ടിരുന്ന അച്ഛന്റെ മകളാണു മുന്നിലിരിക്കുന്നത്. ജനങ്ങളായിരുന്നു ആ അച്ഛന്റെ കണ്ണാടി. ആ കണ്ണാടിയിൽ മുഖം നോക്കിയാണ് അദ്ദേഹം എന്നും ഒരുങ്ങി ഇറങ്ങിയിരുന്നത്.

എന്നാൽ അച്ചു ഉമ്മൻ സംസാരിച്ചു തുടങ്ങിയതു രാജ്യാന്തര പ്രശസ്തയായ ഡിസൈനർ അനാമിക ഖന്നയുടെ പുതിയ കലക്ഷനുകളെക്കുറിച്ചും ദുബായിലെ പ്രീ ലവ്ഡ് ഷോപ്പിങ് കൾച്ചറി'നെക്കുറിച്ചും ആയിരുന്നു. ലോകത്തെ പുതിയ സ്റ്റൈൽ തരംഗങ്ങളെക്കുറിച്ച് ഇൻസ്റ്റ പോസ്റ്റുകൾ കോൾ ചെയ്യുന്ന വേഗത്തിൽ അച്ചു പറഞ്ഞു കൊണ്ടിരുന്നു. രാഷ്ട്രീയത്തിലെ "ഔട്ട്ഫിറ്റുകളെക്കുറിച്ചു നന്നായറിഞ്ഞിരുന്ന അച്ഛനെ ഓർത്തു ചോദിച്ചു, "ഉമ്മൻചാണ്ടിയിൽ നിന്ന് അച്ചു ഉമ്മനിലേക്ക് എത്ര ദൂരം?

അച്ചു ഒന്നു നിശബ്ദയായി. “അപ്പയെ പോലെയാകാൻ ആർക്കു സാധിക്കും? എല്ലാം ക്ഷമിക്കുന്ന, ഉള്ളിലൊതുക്കുന്ന ആൾ. ആക്രമിക്കാൻ വന്നവർക്കു പോലും മാപ്പുകൊടുത്തില്ലേ? അപ്പയ്ക്കെതിരെ ഗൂഢാലോചന നടന്നെന്ന് സിബിഐ റിപ്പോർട്ടു കിട്ടിയിട്ടു പോലും പ്രതികരിച്ചില്ല.

എനിക്കതു പറ്റില്ല. എല്ലാം കേട്ടു മിണ്ടാതിരിക്കാനുമാകില്ല. അതുകൊണ്ടാണു സൈബർ ആക്രമണമുണ്ടായപ്പോൾ പൊലീസിൽ പരാതി കൊടുത്തത്. അപ്പയുണ്ടായിരുന്നെങ്കിൽ പറഞ്ഞേനെ, "കേസൊന്നും വേണ്ട, അങ്ങനൊന്നും പറയണ്ട, അതൊക്കെ വിട്ടേക്ക്...' എന്നൊക്കെ. അത്ര സൗമ്യനായ മനുഷ്യനെതിരെ പ്രവർത്തിച്ചവർക്കു കാലം മാപ്പു നൽകില്ല, ഉറപ്പ്. അച്ചുവിന്റെ വാക്കുകളിൽ കനൽപ്പൊള്ളൽ.

“കുട്ടിക്കാലം തൊട്ടേ അപ്പയോട് അത്ര അഡിക്ടഡ് ആണ് ഞാൻ ജനങ്ങൾക്കിടയിൽ നിറഞ്ഞു നിന്ന് അപ്പയെ എനിക്കു കിട്ടിയിരുന്നില്ല. പക്ഷേ, രോഗബാധിതനായ കാലത്ത് അമ്മയ്ക്കും സഹോദരങ്ങൾക്കും ഒപ്പം നിന്നു പരിചരിക്കാനുള്ള ഭാഗ്യമുണ്ടായി. ഇൻജക്ഷൻ സൂചികളെയും ഏകാന്തതയേയും പേടിയുള്ള ആൾ ഒരു പരാതിയുമില്ലാതെ എല്ലാം സഹിച്ചു. ജനുവരിയിൽ ഞാൻ വലതു കൈത്തണ്ടയിൽ ടാറ്റു ചെയ്തു, അപ്പാസ് പ്രിൻസസ്, അപ്പയെ അതു കാണിച്ചപ്പോൾ സ്നേഹപൂർവം അതിൽ തലോടി തമാശ മട്ടിൽ ചിരിച്ചു.

ഞാനിനി എവിടെയൊക്കെ എത്തിയാലും എന്തൊക്കെ ആയാലും ഉമ്മൻചാണ്ടിയുടെ മകൾ എന്ന പേരിലാണ് അറിയപ്പെടേണ്ടത്. അതാണെന്റെ ഐഡന്റിറ്റി. അതിനപ്പുറം ഒന്നുമില്ല, ഒന്നും വേണ്ട