അങ്ങനെ മങ്ങില്ല സന്തോഷം

മിഡ് ലൈഫ് ക്രൈസിസ് വിഷാദരോഗമാണെന്നു പലരും കരുതും. പക്ഷേ, നാൽപതുകൾ മുതൽ ജീവിതത്തിന്റെ ഉന്മേഷവും നിറങ്ങളും ചോർത്തിക്കളയുന്ന പ്രതിസന്ധിയാണത്. തിരിച്ചറിയാം, നേരിടാം

- എൽസി ഉമ്മൻ

കലാരംഗത്തു സജീവമായ ചുറുചുറുക്കുള്ള ചെറുപ്പക്കാരിയാണു സൗമ്യ. 48 വയസ്സിനിടയിൽ സ്വപ്രയത്നം കൊണ്ടു ഒരു ബിസിനസ് വളർത്തിയെടുത്ത മിടുക്കി. സ്ഥാപനത്തെ ഉയർച്ചയിലേക്കു കൊണ്ടുപോകാൻ എപ്പോഴും ജാഗരൂകയായ സൗമ്യക്കു വീട്ടുകാരുടെ പൂർണ പിന്തുണയുണ്ട്. എന്നാൽ കുറച്ചു നാളുകളായി സൗമ്യയുടെ സമീപനത്തിൽ പ്രകടമായ മാറ്റങ്ങളുണ്ടെന്നു വീട്ടുകാരും സുഹൃത്തുക്കളും ശ്രദ്ധിച്ചു. ഒന്നിനും ഉത്സാഹമില്ലായ്മയും ധൈര്യക്കുറവും. തീരുമാനങ്ങൾ എടുക്കാനും നടപ്പാക്കാനും പ്രയാസപ്പെടുന്നു. മൊത്തത്തിലൊരു വിഷാദഭാവം. ഈ മാറ്റങ്ങൾ, ബിസിനസിനെയും ബാധിച്ചു തുടങ്ങിയപ്പോഴാണു വീട്ടുകാരുടെ നിർബന്ധത്താൽ ഡോക്ടറെ സമീപിച്ചത്. വിഷാദരോഗം എന്നു വീട്ടുകാർ തീർച്ചപ്പെടുത്തിയെങ്കിലും സൗമ്യയുടെ യഥാർഥ പ്രശ്നം വേറൊന്നായിരുന്നു.

40 നും 60 നും ഇടയിൽ പ്രായമുള്ള സ്ത്രീകളിലും പുരുഷന്മാരിലും ഒരേപോലെ പ്രത്യക്ഷപ്പെടുന്ന മാനസികാവസ്ഥയാണു മിഫ് ക്രൈസിസ്. വ്യക്തിത്വത്തിലും പെരുമാറ്റത്തിലും പ്രകടമായ മാറ്റം ഇത്തരക്കാരിൽ കണ്ടേക്കാം. പലപ്പോഴും വിഷാദരോഗമായി തെറ്റിധരിക്കാൻ ഇടയുള്ള ഒന്നാണിത്. ഈ രണ്ട് അവസ്ഥകളും വേർതിരിച്ചറിയാനാകാത്ത വിധം സങ്കീർണമാകുമ്പോഴാകും പലരും ചികിത്സ തേടുന്നത്.

സ്വന്തം വ്യക്തിത്വത്തിലും ആത്മധൈര്യത്തിലും ഉള്ള വിശ്വാസം പോകുന്നതാണു പ്രധാന ലക്ഷണം. ഇതുവരെ അഭിമാനമായി കരുതിപ്പോന്ന കഴിവുകളെക്കുറിച്ചുള്ള ആത്മവിശ്വാസമില്ലായ്മയും ഇതിന്റെ ഭാഗമായി വരും.

ജീവിതത്തിന്റെ അനിശ്ചിതത്വത്തെക്കുറിച്ചുള്ള ചിന്തകളും മുൻകാലങ്ങളിലെ പാളിച്ചകളെപ്പറ്റിയുള്ള ഉത്കണ്ഠകളും തീരുമാനങ്ങൾ എടുക്കുമ്പോൾ തെറ്റിപ്പോകുമോ എന്ന ആശങ്ക, ഉത്തരവാദി ത്തം ഏറ്റെടുക്കാനുള്ള പേടി, ആരോഗ്യ പ്രശ്നങ്ങൾ ഒക്കെയാണ് ഇതിനു കാരണമാകുന്ന ഘടകങ്ങൾ.

സമ്മർദം നിറഞ്ഞ കാലഘട്ടം

മധ്യവയസ്സ് എന്നതു മനുഷ്യായുസ്സിൽ ഏറ്റവും നിർണായകമായ കാലഘട്ടമാണ്. പല ഉത്തരവാദിത്തങ്ങളും ഈ പ്രായത്തിൽ ഏറ്റെടുക്കേണ്ടി വരും. ജോലിയിൽ പ്രമോഷനുകളും അംഗീകാരങ്ങളും കിട്ടുന്നതോടൊപ്പം മക്കളുടെ വിദ്യാഭ്യാസത്തിന്റെയും ജോലിയുടെയും വിവാഹത്തിന്റെയും കാര്യങ്ങളിൽ ഏറ്റെടുക്കേണ്ട ചുമതലകൾ വേറെയും.

സ്ത്രീകൾക്കാണെങ്കിൽ ഹോർമോൺ വ്യതിയാനങ്ങ ൾ സംഭവിക്കുന്ന സമയവുമാണ്. അതോടൊപ്പം, ജീവിത ശൈലി രോഗങ്ങളും കൂടിയാകുമ്പോൾ മധ്യവയസ്സ് ജീവിതത്തിൽ ഏറ്റവും സമ്മർദം നിറഞ്ഞ കാലമായി മാറും.