അവനി വീണ്ടും പാടുന്നു

മാരകരോഗത്തെ പാട്ടു കൊണ്ടും ആത്മവിശ്വാസത്താലും നേരിട്ട അവനിയുടെ സംഗീതമധുരമായ ജീവിതത്തിൽ നിന്ന്

- വി. ആർ. ജ്യോതിഷ്

അവനിയുടെ വെഞ്ഞാറമൂട് ആലന്തറയിലെ വീടിനു മുന്നിൽ ചെറിയൊരു ആമ്പൽ കുളമുണ്ട്. അതിനു ചുറ്റും ഫലവൃക്ഷങ്ങൾ. ചുവപ്പു പരവതാനി എടുത്തെറിഞ്ഞതു പോലെ നിറയെ പഴങ്ങളുമായി റംബൂട്ടാൻ പന്തലിട്ടു പടർത്തിയ പാഷൻ ഫ്രൂട്ട് കുള്ളൻ തെങ്ങുകൾ. പിന്നെയും ധാരാളം ഫലവൃക്ഷങ്ങളും ചെടികളും.

അവനി എസ്. എസ്. എന്ന ഗായികയെ ഇന്ന് മലയാളികൾക്കെല്ലാമറിയാം. കാൻസറെന്ന മാരകരോഗം പിടിപെട്ട് ശബ്ദം നഷ്ടപ്പെട്ടപ്പോൾ പ്രാർഥനയും ആത്മവിശ്വാസവും കൈമുതലാക്കി അതൊക്കെ തിരിച്ചുപിടിച്ച പതിനാറുകാരി. പ്രമുഖ ചാനലുകളിലെ റിയാലിറ്റി ഷോകളിൽ രോഗകിടക്കയിൽ നിന്നുവന്ന് പാടി പ്രേക്ഷകരുടെ കണ്ണുനനയിച്ച പാട്ടുകാരി. വെഞ്ഞാറമൂട് മോഡൽ ഹയർ സെക്കൻഡറി സ്കൂൾ പ്ലസ് വൺ വിദ്യാർഥിനി.

അച്ഛനും അമ്മയ്ക്കും ഭൂമിയോടുള്ള ഇഷ്ടം കൊണ്ടാണ് മകൾക്ക് അവനി എന്നു പേരിട്ടത്. വെഞ്ഞാറമൂട് ടൗണിൽ തന്നെയായിരുന്നു അവനിയുടെ അച്ഛൻ ശിവപ്രസാദിന്റെയും അമ്മ സതിജയുടെയും വീട് ശിവ പ്രസാദിന് ടൗണിൽ പച്ചക്കറി കടയാണ്. വീട്ടമ്മയാണ് സതിജ. രണ്ടു വയസ്സിലേ പാട്ട് മൂളിത്തുടങ്ങിയ അവനിയുടെ ആദ്യ ഗുരു അമ്മയാണ്. സംഗീതം ശാസ്ത്രീയമായി പഠിച്ചെങ്കിലും സതിജ അത് കരിയറാക്കിയില്ല. അമ്മ പകുതിയിൽ നിർത്തിയ പാട്ട് അവനിയിലൂടെ തുടരുന്നു.

ശ്രുതിഭംഗത്തിൽ തളരാതെ

പ്രാഥമിക സംഗീത പഠനത്തിനുശേഷം വെഞ്ഞാറമൂട് ജീവകലയിലെ ബിന്ദു ഹരിദാസിന്റെ ശിഷ്യയായി. അതിനുശേഷം കിളിമാനൂർ ശിവപ്രസാദാണ് സംഗീതഗുരു. അങ്ങനെ പാട്ട് പോലെ മധുരമായി ജീവിതം മുന്നോട്ട് പോകവെയാണ് രോഗത്തിന്റെ വരവ്. അഞ്ചുവർഷം മുൻപാണ് ഈ സംഭവം. പ്രമുഖ ചാനലിൽ മ്യൂസിക് റിയാലിറ്റി ഷോ തുടങ്ങുന്നു. ആദ്യ ഒഡിഷനിൽ പങ്കെടുക്കാൻ പ്രത്യേക പരിശീലനം തുടങ്ങി. പക്ഷേ, അതിനിടയിൽ ചില ബുദ്ധിമുട്ടുകൾ വന്നുതുടങ്ങി. പാടുമ്പോൾ ശ്വാസതടസ്സം. കഴുത്തിലെ ഞരമ്പുകൾ വീർക്കുന്നു. അതു വരെയില്ലാത്ത വേദന. എന്തോ നിസ്സാര പ്രശ്നം എന്നാണ് ആദ്യം കരുതിയത്. തൊട്ടടുത്ത ആശുപത്രികളിൽ ചികിത്സ തേടി.

ആദ്യമാദ്യം ഡോക്ടർമാരും പറഞ്ഞു; “ചെറിയ എതോ അണുബാധയാണെന്ന്. അതിനുള്ള മരുന്നുകളും കഴിച്ചു. പക്ഷേ, അതുകൊണ്ടൊന്നും അസുഖം മാറിയില്ല. ഒടുവിൽ തിരുവനന്തപുരത്തെ സ്വകാര്യ ആശുപത്രിയിൽ എത്തി. പരിശോധനയ്ക്കൊടുവിൽ രോഗത്തിന്റെ ക്രൂരമുഖം തിരിച്ചറിഞ്ഞു. ലിംബോ ബ്ലാസ്റ്റിക് ലിംഫോമ എന്ന കാൻസർ.

വല്യമ്മ തന്ന ധൈര്യം