இந்தியாவின் இதயம் மத்திய பிரதேசம்!

இந்தியாவின் இதயம் என்று அழைக்கப்படும் மத்தியப் பிரதேசத்தில், யுனெஸ்கோ அங்கீகாரம் பெற்ற பல இடங்கள்; சாஞ்சி ஸ்தூபி; கஜூராஹோ; பீம்பேட்கா குகைகள் போன்ற சிறப்பு மிக்க இடங்கள்; பூங்காக்கள்; கோட்டைகள் என கலாச்சார முக்கியத்துவம் வாய்ந்த இடங்கள் இருப்பதால் சுற்றுலாப் பயணிகள் ஏராளமானோர் ஆண்டு தோறும் வருகை தருகின்றனர். அந்த இடங்களை நாமும் கண்டு மகிழ்வோம்.

- திவ்ய மீனா

கஜூராஹோ: நுணுக்கமான சிற்ப வேலைப்பாடுகள் கொண்ட கோவில்களுக்கு புகழ் பெற்றது கஜூராஹோ. யுனெஸ்கோ உலக பாரம்பரிய தலமான கஜூராஹோ, மத்திய பிரதேசத்தின் சத்தர்பூர் மாவட்டத்தில் உள்ளது. இந்திய வரலாற்று கட்டிடக் கலையின் மிக முக்கியமான கஜூராஹோவில் 25 கோவில்கள் உள்ளன. இவைகள் நாகரா பாணியில் கட்டப்பட்டுள்ளன. சிற்றின்பத்தை வெளிப்படுத்தும் சிற்பங்கள் உலகப் புகழ் பெற்றவைகள். இங்கிருக்கும் காந்தாரியா மகா தேவர் கோவில் மிகப் பெரியது. நுணுக்கமான சிற்ப வேலைப்பாடுகளைக் கொண்டது. மேற்கு, கிழக்கு, தெற்கு, என மூன்று தொகுதிகள் இருக்கின்றன. மாலையில் நடக்கும் ஒளி, ஒலிகாட்சிகள் காண அற்புதமாக இருக்கும். பிப்ரவரி மாதம் நடைபெறும் கஜூராஹோ நடன விழாவினைக் காண வரும் சுற்றுலாப் பயணிகள் ஏராளம். போபால் விமான நிலையத்தில் இருந்து கஜூராஹோவை எளிதில் அடையலாம்.

பச்மரி: மத்தியப் பிரதேசத்தின் ஒரே மலை வாசஸ்தலம் பச்மரி. இயற்கையழகு, பழமையான குகைகள், நீர் வீழ்ச்சிகளுக்கு பெயர் பெற்றது. சத்புராவின் ராணி என்று அழைக்கப்படுகிறது. இங்கேயுள்ள உயிர் கோள காப்பகம் யுனெஸ்கோ அங்கீகாரம் பெற்றது. பல அரிய வகை தாவரங்கள் மற்றும் விலங்கினைகளைக் கொண்ட பாதுகாக்கப்பட்ட பகுதியாகும்.

மத்திய பிரதேசத்தின் மிக உயரமான இடமாகிய தூப்கரிலிருந்து சூரிய அஸ்தமனம் காண அற்புதமாக இருக்கும். தவிர பாண்டவர் குகைகள், ஜடாசங்கர் குகைக் கோவில், நீர்வீழ்ச்சிகளைக் காண சுற்றுலாப் பயணிகள் வருகின்றனர்.

சாஞ்சி ஸ்தூபி: பேரரசர் அசோகரால் கட்டப்பட்ட புத்த மதத்தின் பழமையான மற்றும் முக்கியமான பவுத்த நினைவுச் சின்னமாகும் சாஞ்சி ஸ்தூபி. அமைதி, பக்தி மற்றும் கலை நயத்துடன் கட்டப்பட்டுள்ளது. அரைக் கோள வடிவ குவிமாடம், புத்தரின் தியான நிலையைக் குறிக்கிறது. புத்தரின் வாழ்க்கை சம்பவங்களை சித்தரிக்கும் வகையில் நான்கு திசைகளிலும் அழகிய நுழை வாயில்கள் அமைக்கப்பட்டு இருக்கின்றன. அசோகரின் கல்வெட்டுக்களுடன் கூடிய தூண் கொண்ட சாஞ்சி ஸ்தூபி ஒரு யுனேஸ்கோ தளமாகும்.