മഴവില്ലഴകുള്ള മത്സ്യം

കിലോയ്ക്ക് 3,500 രൂപ വരെ വിലയുള്ള മത്സ്യം വിപണിയിലെത്തിക്കുന്ന ഹൈദരാബാദിലെ സംരംഭകൻ

- 

തെലങ്കാനയിലെ വാറങ്കൽ എൻഐടിയിൽ നിന്ന് മെക്കാനിക്കൽ എൻജിനീയറിങ് പഠനം കഴിഞ്ഞിറങ്ങുമ്പോൾ ജോലിയെക്കുറിച്ചല്ല, വേറിട്ടൊരു മത്സ്യ കൃഷിയെക്കുറിച്ചാണ് വാറങ്കൽ സ്വദേശി ആദിത്യ റിത്വിക് നാരാ ചിന്തിച്ചത്. തിലാപ്പിയയോ പംഗേഷ്യസോ അല്ല, കിലോയ്ക്ക് 3,500 രൂപ വരെ വിലയുള്ള വിശിഷ്ട മത്സ്യം റെയിൻബോ ട്രൗട്ടിന്റെ കൃഷിയായിരുന്നു ആദിത്യയുടെ മനസ്സിൽ. സാക്ഷാൽ സാൽമണിന്റെ സഹോദരീമത്സ്യം. 45 കോടി രൂപയോളം മുതൽമുടക്കിൽ ആദിത്യ ആരംഭിച്ച ഹൈടെക് മത്സ്യക്കൃഷി ഇന്ന് രാജ്യത്തെ അക്വാകൾചർ മേഖലയ്ക്കാകെ നവോന്മേഷം പകരുന്ന സംരംഭം.

മെക്കാനിക്കൽ എൻജിനീയറിങ് വൈദഗ്ധ്യവും നൂതനാശയങ്ങൾ നടപ്പാക്കാനുള്ള ഇച്ഛാശക്തിയും ഈ മത്സ്യവിപണിയുടെ പുതുസാധ്യതകളും ഒരുപോലെ കൂട്ടിയിണക്കിയാണ് ഹൈദരാബാദ് നഗരത്തിൽനിന്ന് 60 കിലോമീറ്ററോളം അകലെ ഗുഡൂർ കന്ദുകുറിൽ സ്മാർട് ഗ്രീൻ അക്വാകൾചർ പ്രൈവറ്റ് ലിമിറ്റഡ് എന്ന സംരംഭം ആദിത്യ സാധ്യമാക്കിയത്. വർഷം 365 ടൺ റെയിൻബോ ടൗട്ട് മത്സ്യം വിളവെടുക്കാൻ ശേഷിയുള്ള ഉൽപാദനശാല. കേരളത്തിലുൾപ്പെടെ രാജ്യത്താകെയുണ്ട് ആദിത്യയ്ക്ക് ഉപഭോക്താക്കൾ. അക്കൂട്ടത്തിൽ മലയാളത്തിന്റെ പ്രിയ സിനിമാതാരങ്ങളുമുണ്ട്.

പഠിച്ചും പരിശീലിച്ചും

അതിതീവ്ര ശൈത്യമുള്ള കാലാവസ്ഥയിൽ മാത്രം വളരുകയും ഏറ്റവും അനുകൂല സാഹചര്യത്തിൽ മാത്രം പ്രജനനം സാധ്യമാവുകയും ചെയ്യുന്ന റെയിൻബോ ട്രൗട്ടിനെ റീസർക്കു ലേറ്ററി അക്വാകൾചർ സംവിധാന (RAS) ത്തിൽ വളർത്താനായിരുന്നു ആദിത്യയുടെ ആലോചന. അത്രത എളുപ്പമല്ലെന്നും ബോധ്യവുമുണ്ടായിരുന്നു. അതുകൊണ്ടുതന്നെ RAS സംവിധാനത്തെക്കുറിച്ച് ആഴത്തിൽ പഠിക്കാൻ ആദിത്യ അമേരിക്കയിൽ പോയി. പഠനശേഷം പരീക്ഷണാടിസ്ഥാനത്തിൽ 2019ൽ ഹാച്ചറി തുടങ്ങി. നിലവിൽ ഹിമാചലിൽ ഉൾപ്പെടെ പലയിടത്തും സ്വാഭാവിക ജലാശയങ്ങ ളിൽ റെയിൻബോ ട്രൗട്ട് വളരുന്നുണ്ട്.