അടിവാരത്തിലുമാകാം അടിപൊളി ഏലം

സമതലങ്ങളിലും ഏലം കൃഷി വിജയമെന്നു തെളിയിക്കുകയാണ് കാഞ്ഞിരപ്പള്ളിയിലെ ടോണിയുടെ പരീക്ഷണം

- ജയിംസ് ജേക്കബ് തുരുത്തുമാലി

ഹൈറേഞ്ചുകാരുടെ കുത്തകയായ ഏലം കൃഷി ചെയ്യാൻ മോഹിക്കാത്ത ലോറേഞ്ചുകാരുണ്ടാവില്ല. ഹൈറേഞ്ചിന്റെ കവാടനഗരങ്ങളിലെ കർഷകർക്ക് മേലേപ്പറമ്പുകളിലെ ആദായക്കണക്കുകൾ പ്രലോഭനമാകുന്നത് സ്വാഭാവികം. അതാണ് റബർതോട്ടങ്ങൾക്കു നടുവിലെ വീട്ടുവളപ്പിൽ ഏലം കൃഷിക്കു കാഞ്ഞിരപ്പള്ളി ആനത്താനത്ത് ടോണി സെബാസ്റ്റ്യനെ പ്രേരിപ്പിച്ചത്. ഏലം കർഷകനായ സുഹൃത്തിന്റെ ശുപാർശപ്രകാരം കണിപ്പറമ്പൻ എന്ന ഇനം ഏലത്തിന്റെ 130 തട്ടകളാണ് ആദ്യം നട്ടത്, 2023 ഡിസംബറിൽ. ഈയിനം വികസിപ്പിച്ചത് അണക്കരയിലെ സണ്ണി എന്ന കർഷകനാണ്. അദ്ദേഹത്തിന്റെ തോട്ടത്തിൽ നിന്നു നേരിട്ടു തട്ടകൾ വാങ്ങുകയായിരുന്നു. വീടിനു തൊട്ടടുത്ത് കഷ്ടിച്ച് അരയേക്കർ സ്ഥലം ഏലം കൃഷിക്കു കണ്ടെത്തി. മുൻപ് വനില കൃഷിചെയ്തിരുന്ന ഈ സ്ഥലത്ത് ഏതാനും പ്ലാവുകൾ മാത്രമാണുണ്ടായിരുന്നത്. 9x9 അടി അകലത്തിൽ തട്ടകൾ നട്ടു. ചെടികൾക്കിടയിലൂടെ തുള്ളിനന, മൈക്രോ സ്പ്രിങ്ഗ്ലർ സംവിധാനങ്ങൾ ഒരുക്കി. മണ്ണിൽ ജലാംശവും പോഷകലഭ്യതയും ഉറപ്പാക്കുന്നതിനൊപ്പം അന്തരീക്ഷ താപനില അമിതമായി ഉയരുന്നത് തടയാനാണ് ഉയരത്തിൽ മൈക്രോസിങ്ഗ്ലർ വച്ചത്. വേനലിൽ ഇതിലൂടെ തളിനന നൽകി.